މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާންގެ މައްސަލަ ތަހުގީގު ކުރުމުގައި ހަރަކާތްތެރިވާ ޓީމުގައި ރާއްޖެއިން ބޭރުގެ އިންވެސްޓިގޭޓަރެއް ހިމެނުމުގެ މަސައްކަތް ކުރަމުން އަންނަ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރިލްވާން ގެއްލުނުތާ މިއަދަށް ވަނީ 6 އަހަރުވެފައިވާއިރު އެކަމާއި ގުޅިގެން ރައީސް މިއަދު ޓްވީޓާގައި އާއްމު ކުރެއްވި ނޯޓެއްގައި ވިދާޅުވީ ރިލްވާންގެ މައްސަލައަށް އިންސާފު ނުލިބި ލަސްވަމުންދާ ކޮންމެ ދުވަހަކީ އާއިލާއަށް ލިބޭ އިތުރު ހިތްދަތި ކަމެއް ކަމަށެވެ.
އަދި ހުރަސްތަކާއި ދަތިތަކާއި އެކުގައިވެސް އެ މައްސަލައަށް އިންސާފު ހޯދުމަށް ﷲގެ ވާގިފުޅާއިއެކު ކުރެވެން ހުރި ހުރިހާ ކަމެއް ހުއްޓާނުލާ ސަރުކާރުން ކުރިޔަށް ގެންދާނެ ކަމަށް ރައީސް ވިދާޅުވިއެވެ. ރައީސް ވަނީ ރިލްވާންގެ އާއިލާއިން އެދުނު ގޮތަށް އެ މައްސަލައިގެ ތަހުގީގު ޓީމުގައި ބޭރުގެ އިންވެސްޓިގޭޓަރެއް ބައިވެރި ކުރުމުގެ މަސައްކަތްތައް ކުރަމުން އަންނަ ކަމަށެވެ.
ގެއްލުވާލާފަިއިވާ މިނިވަން ނޫހުގެ ނޫސްވެރިޔާ އަޙްމަދު ރިޟްވާން ޢަބްދުﷲ ގެ މައްސަލައާ ގުޅޭ… pic.twitter.com/XDN7nfxQW2
— Ibrahim Mohamed Solih (@ibusolih) August 8, 2020
ރައީސް ސޯލިހު މިފަދައިން ވިދާޅުވެފައިވާއިރު ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވީ ގެއްލުވާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން އާއި ޔާމީން ރަޝީދުގެ ނަން ބޭނުންކޮށްގެން ކަމަށް ރިލްވާންގެ އާއިލާ އިން މިއަދު ވަނީ ބުނެފައެވެ.
ރިލްވާން ގެއްލުނުތާ މިއަދަށް ހަ އަހަރުވެފައިވާއިރު ރާއްޖެޓީވީގެ ޕްރޮގްރާމެއްގައި މިއަދު ވާހަކަ ދައްކަމުން ރިޟްވާންގެ ދައްތަ ޝެހެނާޒް އަދްނާން ބުނީ ރިލްވާން އާއި ޔާމީނަށް ވެސް މިއަދާއި ހަމައަށް އިންސާފެއް ނުލިބޭ ކަމަށާއި މި ދެ އާއިލާ އަށް ވެސް މިކަމުގައި އިންސާފު ހޯދައިދިނުމަށް ސަރުކާރުގައި އާދޭސް ދަންނަވާ ކަމަށެވެ.
"އެ ކުދިންގެ ނަން ބޭނުން ކުރައްވައިގެން ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގަތީ" ޝެހެނާޒް ބުންޏެވެ.
މި ޕްރޮގްރާމްގައި ބައިވެރިވި ރިލްވާންގެ މަންމަ އައިމިނަތު އީސާ ބުނީ މާލޭގައި އުޅޭތާ މިހާ ދުވަސްވީއިރު ވެސް ދުވަހަކު ވެސް މީހެއްގެ ކައިރީގައި ވޯޓެއް ދޭން ބުނެފައި ނޯންނާނެ ކަމަށާއި ނަމަވެސް ރައީސް ސޯލިހު ހޮވުމަށްޓަކައި އަމިއްލަ ރަށަށް ގޮސް ރައްޓެހިން ކައިރީގައި ވެސް އާދޭސް ކުރި ކަމަށެވެ.