މަރުކަޒީ ބޭންކް އެމްއެމްއޭ އިން ދައުލަތަށް ވޭތުވެދިޔަ ހަތަރު މަސްތެރޭގައި ހަތަރު ބިލިއަން ރުފިޔާގެ އޯވާޑްރޯއެއް ދޫކޮށްފިއެވެ.
އެމްއެމްއޭ އިން އާންމުކޮށްފައިވާ މިދިޔަ މަހުގެ ބެލެންސް ޝީޓުގައި "ސަރުކާރަށް ދޫކޮށްފައިވާ ފައިސާ" ގެ ގޮތުގައި ހަތަރު ބިލިއަން ރުފިޔާ ހިމެނެއެވެ. އެ ފައިސާއަކީ ދައުލަތުގެ ހަރަދުތައް ހަމަޖައްސައިދޭން ދިން ފައިސާއެވެ.
އެމްއެމްއޭ އިން މިފަދައިން އޯވަޑްރޯ ދޫކޮށްފައި މިވަނީ އެ އޯވަޑްރޯ ދޫކުރުމަށް މަޖިލީހުން ހުއްދަ ދީފައި އޮތުމުންނެވެ. މަޖިލީހުން ހުއްދަ ދިނީ 4.2 ބިލިއަން އޯވަޑްރޯ ކުރުމަށެވެ.
މަޖިލީހުން އެ އަދަދު ދޫކުރުމަށް ފާސްކުރީ ދައުލަތުގެ ހަރަދަށް ޒިންމާވުމުގެ ގާނޫނަށް އިސްތިސްނާ ވާން ފިނޭންސް މިނިސްޓަރު އިބްރާހިމް އަމީރު އެދިވަޑައިގަންނެވި ގޮތަށެވެ.
މިދިޔަ އޭޕްރީލް މަހުގެ 22ވަނަ ދުވަހު ފިނޭންސް މިނިސްޓަރ އިބްރާހިމް އަމީރު މަޖިލީހަށް ފޮނުއްވެވި ސިޓީގައި ވިދާޅުވެފައި ވަނީ ދައުލަތުގެ ހަރަދަށް ޒިންމާވުމުގެ ގާނޫނުގެ ދަށުން އެކުލަވާލައިފައިވާ ފިޒިކަލް ހަމަތަކަކީ، އެ ހަމަތަކަށް ފިނޭންސް މިނިސްޓްރީ އިން އަމަލުކުރުން ލާޒިމް ހަމަތަކެއް ކަމުގައި ވީނަމަވެސް، މިހާރު މުޅި ދުނިޔެއަށް އަދި ރާއްޖެއަށް ދިމާވެފައިވާ ކޮވިޑް-19 އިގެ ބަލިމަޑުކަމުގެ ސަބަބުން މިހާރު ރާއްޖޭގެ އިގްތިސާދީ އަދި މާލީ ހާލަތަށް ދިމާވެފައިވާ ގޮންޖެހުންތަކާއި އެކު، އެ ގާނޫނުގެ 32 ވަނަ މާއްދާގައި ކަނޑައަޅައިފައިވާ ހަމަތަކަށް އަމަލު ކުރުމަކީ މިދަނޑިވަޅުގައި އިގްތިސާދީ ގޮތުން ކުރެވިދާނެ ކަމެއް ނޫން ކަމަށެވެ.
މިނިސްޓަރު އަމީރު ވަނީ އެ ސިޓީއާ އެކުގައި ކޮވިޑް19 އާ ގުޅިގެން އިގްތިސޯދީ އަދި މާލީ ލޮޅުމާއި އެކު ދައުލަތުގެ ހަރަދުތަކަށް ބޭނުންވާ ކޭޝް ފްލޯ ހޯދުމަށް މަޖިލީހަށް ލިޔުމެއް ފޮނުވާފައެވެ. ފިނޭންސް މިނިސްޓްރީން ވަނީ މިހާރުގެ ހާލަތާއި ގުޅޭ ގޮތުން ތިން ސިނާރިއޯ އެއް އެކުލަވާލައިފައެވެ. އޭގެތެރެއިން މިނިސްޓަރު އަމީރު ވިދާޅުވަނީ މިހާރު ކުރިމަތިވާނެ ކަމަށް އެންމެ ބޮޑަށް ލަފާކުރެވޭ ސިނާރިއޯއަކީ ސިނާރިއޯ ތިނެއް ކަމަށެވެ.
ސިނާރިއޯ ތިނެއްގައި ރާއްޖެއަށް ފަތުރުވެރިން ޒިޔާރަތްކުރާ އަދަދު 50 އިންސައްތަ ދަށްވެ، ބެޑްނައިޓްސް 39 އިންސައްތަ ދަށްވާނެކަމަށް ލަފާކޮށްފައިވެއެވެ. އަދި ރާއްޖޭގެ ރިއަލް އިކޮނޮމީގެ އެހެން ސެކްޓަރތަކަށް ވެސް މީގެ އަސަރުކޮށް، އިގްތިސާދުގެ ޖުމުލަ ޑިމާންޑް ދަށްވާނެ ކަމަށް ލަފާކޮށްފައިވެއެވެ. އެއާއެކު، ރާއްޖޭގެ އިގްތިސާދު 2020 ވަނަ އަހަރު 5.11 އިންސައްތައިން ދަށްވާނެ ކަމަށް ލަފާކޮށްފައިވެއެވެ.
ރާއްޖޭގެ އިގްތިސާދީ ކުރިއެރުމަށާއި ފަތުރުވެރިކަމަށް އަންނަ ބޮޑު ހީނަރުކަމާއެކު، ދައުލަތުގެ އާމްދަނީ 2020 ވަނަ އަހަރުގެ ބަޖެޓުގައި އަންދާޒާކުރި މިންވަރާ އަޅައި ބަލާއިރު 49 އިންސައްތަ ދަށްވާނެ ކަމަށް ސިނާރިއޯ ތިނެއްގައި ވަނީ ލަފާކޮށްފައެވެ. އެ ސިނާރިއޯގައި، އާމްދަނީ އާއި ހިލޭ އެހީގެ ގޮތުގައި 2020 ވަނަ އަހަރު ލިބޭނެކަމަށް ލަފާކުރެވެނީ 2.15 ބިލިއަން ރުފިޔާއެވެ. މި އަހަރު މިހާތަނަށް ލިބިފައިވަނީ 6.4 ބިލިއަން ރުފިޔާއެވެ.