ދިވެހި ދައުލަތް މިހާރު ވެއްޓިފައިވާ ހާލަތުން އަރައިގަތުމަށްޓަކައި މަޖިލީހަށް ރިވައިޒް ބަޖެޓެއް ނުފޮނުވުމުން މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް ނުރުހުން ފާޅުކުރައްވައިފިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ދަރަނީގެ މިންވަރު ސާފުނުވާ ކަމަށާއި ފިނޭންސް މިނިސްޓްރީގައި މިހާރު ހުރި ހިސާބުތަކާއި ރައްޔިތުންގެ މަޖިލީހުގައި ހުރި ހިސާބުތަކާ ދިމާނުވާ ކަމަށް ވިދާޅުވެ، ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު މަޖިލިހަށް ހުށަހެޅުއްވި މައްސަލައަށް ބަހުސް ކުރައްވަމުން އަލީ އާޒިމް ވިދާޅުވީ ދައުލަތް ވެއްޓިފައިވާ ހާލަތު މިއަދު ދައުލަތުގެ ވަޒީރުންނަށް ވެސް އެނގެން ޖެހޭ ކަމަށެވެ.
ނަމަވެސް އެކަން ނޭނގޭ ކަމަށް ހަދައިގެން މަޖިލީހުގެ މެންބަރުން އަނދިރި ގަނޑެއްގެ ތެރޭގައި ބެހެއްޓުމަށް މަސައްކަތް ނުކުރުމަށް އާޒިމް ވަނީ އެދިވަޑައިގެންފައެވެ. އާޒިމް ވިދާޅުވީ މިއަދު ގައުމު މިއޮތް ހާލަތުން އަރައިގަތުމަށް މަޖިލީހަށް ރިވައިޒް ބަޖެޓެއް ހުށަހަޅަން ޖެހޭ ކަމަށެވެ. ނަމަވެސް އެކަން އަދިވެސް ސަރުކާރުން ނުކުރާ ކަމަށެވެ. މަޖިލިސް ޗުއްޓީއަށް ދާން އުޅޭ ކަމަށް ވިދާޅުވެ އާޒިމް ވިދާޅުވީ އެކަމަކީ [ރިވައިޒް ބަޖެޓު]ގެ މައްސަލަ އަވަހަށް މަޖިލީހަށް އަންނަން ޖެހޭ ކަމަށެވެ.
މީގެއިތުރުން އިދިކޮޅު ފަރާތްތަކުން ޑޮލަރެއްގެ އަގު 20 ރުފިޔާއަށް އުޅޭކަން ފާހަގަކުރައްވާފައިވުމުން އަލީ އާޒިމް ވިދާޅުވީ މިއަދު ދައުލަތް ވެއްޓިފައިވާ އަނދަވަޅަށް ވެއްޓިގެން އުޅެނީ ކުރީގެ ރައީސް އަބްދުﷲ ޔާމީންގެ ސަރުކާރުން ކަން ކޮށްފައިވާ އޮތް ގޮތުން ކަމަށެވެ. އެގޮތުން ދައުލަތް ޒިންމާވާ ގޮތަށް އާއްމު ފަރުދުންނަށް ލޯނު ދޫކޮށްފައިވާތީވެސް އާޒިމް ވަނީ ނުރުހުންފާޅު ކުރައްވާފައެވެ.