ނޭޝަނަލް އިންޓަގްރިޓީ ކޮމިޝަނުގެ ރައީސްގެ މަގާމުގައި ހުންނެވި އަހުމަދު ސުލައިމާން މަގާމުން ވަކިކޮށްފިއެވެ.
އޭނާ މަގާމުން ވަކިކޮށްފައި ވަނީ ސުލައިމާން ވަކި ކުރުމަށް އެދި ރައީސް އިބްރާހީމް މުހައްމަދު ސޯލިހަށް މަޖިލީހުގެ މިނިވަން މުއައްސަސާތަކާ ކޮމެޓީން ލަފާ އަރުވާފައި ވަނިކޮށެވެ.
ރައީސް އޮފީހުން އެންއައިސީ އަށް ފޮނުވި ސިޓީގައި ބުނެފައި ވަނީ ރައްޔިތުންގެ މަޖިލީހުން ފާސްކޮށް ރައީސަށް ލަފާދެއްވާފައިވާތީ އޭނާ ވަކިކުރަން ނިންމާފައިވާ ކަމަށެވެ. މި ލަފާ ރައްޔިތުންގެ މަޖިލީހުން އެރުވީ މިދިޔަ މަހުގެ 21ވަނަ ދުވަހުއެވެ.
ސުލައިމާންގެ އިތުރުން އެ ކޮމިޝަނުގެ ހަތަރު ހަތަރު މެންބަރަކު މަގާމުން ވަކި ކުރުމަށް ރައީސް ސޯލިހަށް ލަފާ އަރުވަން މިނިވަން މުއައްސަސާތަކާއި ބެހޭ ކޮމެޓީން ވަނީ ނިންމާފައެވެ.
އެގޮތަށް ނިންމާފައި ވަނިކޮށް އެ ކޮމިޝަނުގެ ތިން މެންބަރަކު މަގާމުން އިސްތިއުފާ ދެއްވިއެވެ. އެއީ ނާއިބު ރައީސް ހައްސާން ހަމީދާއި އެންއައިސީގެ މެންބަރު ހަދީޖާ އަބްދުﷲގެ އިތުރުން ކޮމިޝަންގެ މެންބަރު އަހުމަދު އަމީންނެވެ.
ސުލައިމާން އެންއައިސީގެ ރައީސްގެ މަގާމަށް އައްޔަން ކުރެއްވީ 2018ވަނަ އަހަރުގެ މާޗު މަހުގެ އެއްވަނަ ދުވަހުއެވެ. އޭނާ އަކީ އިލެކްޝަންސް ކޮމިޝަނުގެ ކުރީގެ ރައީސެވެ.