ޗައިނާގެ ލޯނުތަކުގެ ސަބަބުން ދިވެހި ދައުލަތަށް މާބޮޑު ބުރައެއް ނާންނާނެ ކަމަށް ކުރީގެ މާލީ ވަޒީރު އަދި ކުރީގެ ނާއިބު ރައީސް އަބްދުﷲ ޖިހާދު ވިދާޅުވެއްޖެއެވެ.
ޖިހާދު މިފަދައިން ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ދަރަނީގެ މިންވަރު ސާފުނުވާތީ އެކަން ސާފުކުރުމަށް މިއަދު ކުރިއަށްގެންދިޔަ މުޅި މަޖިލީހުގެ ކޮމިޓީގައި ވާހަކަދައްކަވަމުންނެވެ. ޖިހާދު ވިދާޅުވީ އޭނާ މާލީ ވަޒީރުކަމުގައި ހުންނެވިއިރު ޗައިނާގެ އެގްޒިމް ބޭންކް އިން ލޯނު ނެގި ކަމަށެވެ.
"އެއް ކަމަކީ ބްރިޖަށް ބޭނުންވާ ލޯނު. އެއް ކޮންޕޯނެންޓްއަކީ ގްރާންޓް [ހިލޭ އެހީ] އަނެއް ކޮމްޕޯނެެންޓަކީ ލޯނު. އެހެން ނަމަވެސް އެއީ ސޮފްޓް ލޯނެއް،" ޖިހާދު ވިދާޅުވިއެވެ.
އޭނާ ވިދާޅުވީ އެ ލޯނުތަކަކީ ވަރަށް ކުޑަ އިންޓްރެސްޓެއްގައި ފަހުން ދައްކާ ގޮތަށް ނަގާފައިވާ ލޯނުތަކެއް ކަމަށެވެ. އެވަރުގެ ލޯނެއް އެހެން ފަރާތަކުން ދޭތޯ ބެލި ކަމަށާއި ނަމަވެސް އެގްޒިމް ބޭންކުން އެ ލޯނު ނެގީ އެހެން ފަރާތުން އެ ލޯނު ދޭން ނެތުމުން ކަމަށް ޖިހާދު ވިދާޅުވިއެވެ. އޭނާ ވިދާޅުވީ ކިތަންމެ ވަރަކަށް ލޯނު ބޭނުންވި ނަމަވެސް ލޯނު ދޫކުރުމުގައި "ސިންގަލް އެކްސްޕޯޝާ ލިމިޓް" އެއް ގައުމުތަކުން ގެންގުޅޭ ކަމަށެވެ.
"ޗައިނާ ސަރުކާރުން ލޯނެއް ދުލެއް ނުކުރާނެ ސިންގަލް އެކްސްޕޯޝާ ކަންޓްރީ ލިމިޓަށްވުރެ މައްޗަކަށް. ޗައިނާ ސަރުކާރުން ވެސް ލޯނު ދިން ނަމަވެސް ލިމިޓްގައި ހިފަހައްޓާނެ،" ޖިހާދު ވިދާޅުވިއެވެ.