ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ޗެއާމަން އަކަށް މުޙައްމަދު ޖައިސް އިބްރާހީމް ޕްރައިވަޓައިޒޭޝަން ބޯޑުން ހަމަޖައްސައިފިއެވެ.
ޖައިޝް އެ މަގާމަށް ހަމަޖެއްސެވިއިރު އެޗްޑީސީގެ ބޯޑުގައި ޖުމްލަ 6 ބޭފުޅަކު ޖައިޝްގެ އިތުރުން ތިއްބަވައެވެ. އެއީ މެނޭޖިން ޑިރެކްޓަރު ސުހައިލް އަހުމަދާއި ޑިރެކްޓަރުންގެ ގޮތުގައި ތިއްބަވާ މުހައްމަދު އަރްފާތާއި އަބްދުﷲ ރަމީޒާއި އަހުމަދު އާތިފްގެ އިތުރުން ހަސަން މުނީޒެވެ.
އެޗްޑީސީގެ ޗެއާމަންގެ މަގާމަށް ބޭފުޅަކު ހަމަޖައްސާފައިވާއިރު ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އެޗްޑީސީއާ އެއްކޮށްލަން އުޅޭ ކަމުގެ ވާހަކަތަކެއް ވެސް އަންނަނީ ދެކެވެމުންނެވެ.
ނަމަވެސް އެކަމާއި ގުޅޭ އިތުރު ތަފްސީލީ މައުލޫމާތުތަކެއް އަދި ލިބޭ ގޮތެއް ނުވެއެވެ. ޖީއެމްއައިޒެޑްއެލްގެ މެނޭޖިން ޑިރެކްޓަރު އިބްރާހިމް ރަޝީދު (އިބޫ) ވިދާޅުވެފައި ވަނީ ޖީއެމްއައިޒެޑްއެލްގެ މަސައްކަތްތައް ހައުސިން ޑިވެލޮޕްމެންޓާއި (އެޗްޑީސީ)އާ އެއްކޮށްލުމަށް މަޝްްވަރާ ކުރުމަށް ފިނޭންސުން އިއްޔެ އެ ކުންފުންޏަށް ސިޓީއެއް ފޮނުވާފައިވާ ކަމަށެވެ.