ނޭޝަނަލް އިންޓަގްރިޓީ ކޮމިޝަން (އެންއައިސީ)ގެ މެންބަރު ކަމަށް ކުރިމަތިލާފައިވާ ފަރާތްތަކުގެ ނަންތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުވައިފިއެވެ.
ރައީސް އޮފީހުން މިއަދު ބުނީ "ނޭޝަނަލް އިންޓެގްރިޓީ ކޮމިޝަން" ގެ 3 މެންބަރުން އިސްތިޢުފާ ދެއްވާފައިވާތީ، ހުސްވެފައިވާ މަގާމުތަކަށް މެންބަރުން އައްޔަންކުރުމަށްޓަކައި، އެ ގާނޫނުގެ 11 ވަނަ މާއްދާގައިވާ ގޮތުގެމަތީން އިއުލާނު ކުރުމުން، އެކަމަށް އިޖާބަދެއްވި ހުރިހާ ބޭފުޅުންގެ ނަންތައް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ރައްޔިތުންގެ މަޖިލީހަށް ހުށަހަޅުއްވާފައިވާ ކަމަށެވެ.
އެންއައިސީގެ މެންބަރު ކަމުން އިސްތިއުފާ ދެއްވާފައިވާ މެންބަރުންނަކީ އެ ކޮމިޝަނުގެ ނާއިބު ރައީސް ހައްސާން ހަމީދާއި އެންއައިސީގެ މެންބަރު ހަދީޖާ އަބްދުﷲގެ އިތުރުން ކޮމިޝަންގެ މެންބަރު އަހުމަދު އަމީންނެވެ.
މިއަދުވެސް އެންއައިސީގެ މެންބަރުކަމުގެ މަގާމަށް ކުރިމަތިލުމަށް ވަނީ ހުޅުވާލައިފައެވެ. އެއީ އެ ކޮމިޝަނުގެ ރައީސްގެ މަގާމުގައި ހުންނެވި އަހުމަދު ސުލައިމާން މަގާމުން ވަކި ކުރެއްވުމުން އޭނާގެ މަގާމު ހުސްވެފައި ވާތީއެވެ.