ދަނޑުވެރި ނަފާ ލޯނުގެ ގޮތުގައި 17 ފަރާތަކަށް ލޯނު ދޫކޮށްފައިވާ ކަމަށް އެސްއެމްއީ ބޭންކުން ބުނެފިއެވެ.
އެ ބޭންކުން ބުނީ 17 ފަރާތަކަށް ދަނޑުވެރި ނަފާ ލޯނުން 4.7 މިލިއަން ރުފިޔާ ދޫކޮށްފައިވާ ކަމަށެވެ. މި ލޯނަކީ އެސްޑީއެފްސީއާއި ފިޝަރީސް، މެރިން ރިސޯސަސް އެންޑް އެގްރިކަލްޗާއާއި ގުޅިގެން ދޫކުރާ ލޯނެކެވެ.
މި ލޯނަކީ ދަނޑުވެރިކަމުގެ އިގްތިސާދު ފުޅާކުރުމުގެ އިތުރުން އިންވެސްޓް ކުރެވޭނެ މަގުތައް ފަހިކޮށްދޭނެ ލޯނެއް ކަމަށް އެސްއެމްއީ ބޭންކުން ބުންޏެވެ.
މި ލޯނުގެ ދަށުން ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަމުގެ މަޝްރޫއުތަކަށާއި ލައިވްސްޓޮކް ފާމިންގް އަދި ގަސް އުފައްދާ ނާސަރީތައް ގާއިމް ކުރުމަށް އިންވެސްޓް ކުރެވޭނެ ކަމަށް އެސްއެމްއީ އިން ބުންޏެވެ.
މި ލޯނު ދޫކުރަނީ އެންމެ 6 ޕަސެންޓު އިންޓްރެސްޓު ރޭޓުގައެވެ. އެ ލޯނު ހަތް އަހަރުގެ ތެރޭގައި އަނބުރާ ދައްކަން ޖެހެއެވެ. އަދި އޭގެ ކުރިން ލޯނު ނުދެއްކިއްޖެ ނަމަ 12 މަހުގެ ގްރޭސް ޕީރިއަޑެއް ވެސް ލިބޭނެއެވެ.
މި ލޯނުގެ ގޮތުގައި އެންމެ މަދުވެގެން ލިބޭނީ 75،000 ރުފިޔާއެވެ. އަމިއްލަ ފަރުދުންނަށް 500،000 ރުފިޔާއާއި ހަމައަށް ލޯނު ނެގެއެވެ.