މަނީ ލޯންޑަރިންގެ ކުށް ސާބިތުވެ ފަސް އަހަރު ދުވަހަށް ޖަލަށް ލުމަށް ހުކުމް ކޮށްފައިވާ ކުރީގެ ރައީސް އަބްދުﷲ ޔާމީނަށް ޖަލުން ލިބެންޖެހޭ ހިދުމަތްތައް އިތުރު ކުރުމާއި ގުޅޭ ގޮތުން ހޯމް މިނިސްޓަރު އިމްރާން އަބްދުﷲ އާއި މަޝްވަރާ ނުކުރާ ކަމަށް އިދިކޮޅު ޕީޕީއެމް އަދި ޕީއެންސީ އިން ބުނެފިއެވެ.
އެކޯލިޝަނުން މިފަދައިން ބުނެފައި ވަނީ ހޯމް މިނިސްޓަރާއި އެކުގައި ބޭއްވި ބައްދަލުވުމުގައި ރައީސް ޔާމީނަށް ޖަލުން ލިބޭ ހިދުމަތްތައް އިތުރުކުރުމާ ގުޅޭގޮތުން އެ ކޯލިޝަނުގެ ލީޑަރުން މަޝްވަރާ ކުރި ކަމަށް ބުނެ ހޯމް މިނިސްޓްރީން ޓްވީޓު ކުރުމާއި ގުޅިގެން ނެރެފައިވާ ނޫސްބަޔާނެއްގައެވެ.
އެ ކޯލިޝަނުން މިއަދު ނެރެފައިވާ ނޫސްބަޔާނެއްގައި ބުނީ ރައީސް ޔާމީނަށް ލިބިވަޑައިގަންނަވަންޖެހޭ ޙައްޤުތަކަކުން އެމަނިކުފާނު މަޙްރޫމުކޮށް، އެމަނިކުފާނަށް ދެމުން ގެންދާ އަނިޔާތައް ހުއްޓާލުމަށް އެދިވަޑައިގެންފައިވާ ކަމަށެވެ.
އެހެންނަމަވެސް، ރައީސް، ޔާމީނަށް "ޖަލުން ލިބޭ ޚިދުމަތްތައް އިތުރު ކުރުމާއި ގުޅޭ ގޮތުން" އެ ކޯލިޝަންގެ ފަރާތުން ހޯމް މިނިސްޓަރާ ބައްދަލުކުރި ކަމަށް ބުނެ ދޮގު ޓްވީޓެއް ހޯމް މިނިސްޓްރީން ކުރައްވާ ކަމުގެ ޙަޤީޤަތް ރައްޔިތުންނަށް އޮޅުވާލަން މަސައްކަތް ކޮށްފައިވާ ކަމަށް ބަޔާނުގައި އިދިކޮޅު ކޯލިޝަނުން ބުނެފައިވެއެވެ. އެކަން ވަނީ އެ ކޯލިޝަނުން ހަރުކަށި އިބާރާތުން ކުށްވެރި ކޮށްފައެވެ.
އިދިކޮޅުން ބުނީ ޕީޕީއެމް ގެ ރައީސް، ރައީސް ޔާމީންގެ ލޯޔަރުންނާއި އެމަނިކުފާނަށް ބައްދަލު ނުވެ ގިނަ ދުވަސްތަކެއް ފާއިތުވަމުންދާތީއާއި އަދި އެންމެ ފަހުން ހައިކޯޓުގައި ބޭއްވުނު ރައީސް ޢަބްދުﷲ ޔާމީން ޢަބްދުލްޤައްޔޫމްގެ އިސްތިޢުނާފް އަޑު އެހުމުގައިވެސް، އެކަން ހަމަޖައްސަވައިދެއްވުމަށް ފަނޑިޔާރުންވެސް ވިދާޅުވެފައިވާއިރު، އެކަން ހަމަނުޖެހި ގިނަ ދުވަސްތަކެއް ފާއިތުވަމުންދާތީ އެކަމުގެ ކަންބޮޑުވުން ފާޅުކޮށް އެކަން ހަމަޖައްސަވައިދެއްވުން އެދި ހޯމް މިނިސްޓަރުގެ އަރިގައި އެ ކޯލިޝަނުގެ ލީޑާޝިޕުން އެދިފައިވާ ކަމަށެވެ.
އެކަން އެމަނިކުފާނަށް ހުށަހަޅުއްވަން ޖެހިވަޑައިގަތީ، ހައިކޯޓުގެ ފަނޑިޔާރުން އެކަމަށް ޢަމުރުކުރެއްވި ފަހުންވެސް މަހަކަށް ވުރެ ގިނަ ދުވަސް ފާއިތުވެގެން ދިޔައިރުވެސް، އަދި ރައީސް ޔާމީންގެ ލޯޔަރުން އެކަން ހަމަޖައްސަވައިދެއްވުމަށް ކަރެކްޝަންސްގައި އެތައް ފަހަރެއްގެ މަތިން އެދެމުންދާއިރުވެސް، ކަރެކްޝަންސްއިން އެކަން ހަމަޖައްސަވައި ނުދެއްވާ ދިގު ދަންމަމުން ގެންދާތީއާއި، އަދި ކޮމިޝަނަރު އޮފް ޕްރިޒަންސްއާއި ބައްދަލުކުރުމަށް ލީޑާޝިޕުން ކުރި މަސައްކަތް ނާކާމިޔާބު ވުމުން ކަމަށް އިދިކޮޅުން ބުންޏެވެ.