ސްޓްރޯކް ޖެހޭ މީހުންނަށް ފަރުވާދޭ ޚާއްސަ ސެންޓަރެއްގެ ޚިދުމަތް އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗުގައި ފަށައިފިއެވެ.
މިއީ ރާއްޖޭގައި ހުޅުވި މިފަދަ ފުރަތަމަ ސެންޓަރެވެ. ސްޓްރޯކް ޖެހޭ މީހުންނަށް ފަރުވާދިނުމަށްޓަކައި އައިޖީއެމްއެޗުގައި ހުޅުވި ސެންޓަރަކީ، ސްޓްރޯކް ޖެހިގެން އަންނަ މީހުންނަށް ވީހާވެސް ގާތުން ފަރުވާދީ ޙާލަތު މޮނިޓާ ކުރުން އިތުރަށް ފުޅާކުރުމުގެ މަޤްޞަދުގައި ހުޅުވި ސެންޓަރެއްކަމަށް އެ ހޮސްޕިޓަލުން ބުނެއެވެ.
މި ސެންޓަރުގައި މިހާރު އެއްފަހަރާ 6 މީހުންނަށް އެޑްމިޓް ކޮށްގެން ފަރުވާދެވޭނެ ކަމަށް އައިޖީއެމްއެޗުން ބުނެއެވެ. އަދި މިފަދަ ބަލި މީހުންގެ ހާލަތު ކުރިއަށްވުރެ ގާތުން ބެލުމުގެ މަގުފަހިވެގެން ދާނެ ކަމަށްވެސް އައިޖީއެމްއެޗް އިން ބުންޏެވެ.
މީގެއިތުރުން ފިޒިއޮތެރަޕީއާ ސްޕީޗު ތެރެޕީއާ އޮކިއުޕޭޝަން ތެރެޕީ ފަދަ އިތުރު ހިދުމަތްތައް ވެސް ފޯރުކޮށްދެވޭނެ ކަމަށް އައިޖީއެމްއެޗް އިން ބުނެއެވެ. މި ސްޓްރޯކް ސެންޓަރަކީ މުސްތަގުބަލުގައި އެޑްވާންސް ސްޓްރޯކް ސެންޓަރެއް ގާއިމް ކުރުމަށް އެޅޭ ފުރަތަމަ ބިންގާ ކަމަށްވެސް އައިޖީއެމްއެޗް އިން ބުންޏެވެ.