ހައި ކޯޓުގެ ފަނޑިޔާރު ޝުޖާއު އުސްމާނު ފަނޑިޔާރުކަމުން އިސްތިއުފާ ދެއްވައިފިއެވެ.
ފަނޑިޔާރުކަމުން އިސްތިއުފާ ދެއްވައި، ޝުޖާއު އުސްމާނު މިއަދު ނެރުއްްވި ބަޔާނެއްގައި ވިދާޅުވީ ފަނޑިޔާރުންގެ މިނިވަންކަން ގެއްލިފައިވާ ކަމަށެވެ. އަދި ވަކި ފަރާތަކަށް ނުޖެހި އިންސާފު ގާއިމްކުރުމުގެ ދޮރު ބަންދުވެފައިވާކަމަށެވެ.
ޝުޖާއު އުސްމާން މަގާމުން އިސްތިއުފާދީފައި މިވަނީ ހައިކޯޓުގެ ފަނޑިޔާރުކަމުން ވަކި ކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމާ އެ މައްސަލަ ރައްޔިތުންގެ މަޖިލީހަށް ހުށަހަޅަން ނިންމާފައިވަނިކޮށެވެ.
ޝުޖާއު އުސްމާނާއި ގުޅޭ ގޮތުން ޖޭއެސްސީން ތަހުގީގު ކުރަމުން ދިޔަ ފުރަތަމަ މައްސަލަ އަކީ 2018 ވަނަ އަހަރު ބޭއްވި ރިޔާސީ އިންތިހާބުގެ ކެމްޕެއިންގެ ތެރޭގައި ގއ. ގެމަނަފުއްޓަށް ނުރަސްމީ ދަތުރެއްކޮށް ރިޔާސީ ކެންޑިޑޭޓަކަށް ވޯޓު ހޯދުމަށް މަސައްކަތް ކުރި މައްސަލައެކެވެ.
ދެވަނަ މައްސަލައަކަށް ބަލަމުން ދަނީ ކްރިމިނަލް ކޯޓުގެ އަމުރަކުން ބަންދުކޮށްފައި ހުރި މީހެއްގެ އާއިލާއާ ބައްދަލުކޮށް، އެމީހުންގެ ވޯޓު ލިބިއްޖެނަމަ، ބަންދުގައި ހުރި މީހާ މިނިވަންކުރާނެ ކަމުގެ މަޝްވަރާކޮށްފައިވާކަމުގެ މައްސަލައެއް ކަމަށް ޖޭއެސްސީން ބުންޏެވެ. މި މައްސަލަ ބަލަން ފެށުމުން ދެ މަސް ދުވަހަށް ޝުޖާއު އުސްމާން ވަނީ ސަސްޕެންޑު ކޮށްފައެވެ.