ޖުޑީޝަލް ސާވިސް ކޮމިޝަން (ޖޭއެސްސީ) އިން މައްސަލަ ބެލުމަށްފަހު ވަކި ކޮށްދިނުމަށް ރައްޔިތުންގެ މަޖިލީހަށް ހުށަހެޅުމުން ފަނޑިޔާރުން އިސްތިއުފާ ދެއްވުމުން އެ މައްސަލާގައި ދެވަނަ ވިސްނުމަކަށް ދާން ޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާ ފައްޓަވައި ދެއްވަމުން ރައީސް ނަޝީދު ވިދާޅުވީ ހައިކޯޓުގެ ފަނޑިޔާރު ޝުޖާއު އުސްމާން ވަކިކުރަން ޖޭއެސްސީން ފޮނުވާފައިވާއިރު އޭނާ މަގާމުން އިސްތިއުފާ ދެއްވާފައިވާ ކަމަށެވެ. އަދި އެ މައްސަލަ މަޖިލީހުގެ ޖުޑީޝަރީ ކޮމެޓީން ދިރާސާ ކުރަމުން އަންނަ ކަމަށްވެސް ނަޝީދު ވިދާޅުވިއެވެ.
މީގެކުރިންވެސް އެހެން ބައެއް ފަނޑިޔާރުން އެފަދައިން އަމަލުކޮށްފައިވާ ކަމަށް ނަޝީދުގެ ވާހަކަފުޅުގައި ވަނީ ފާހަގަކުރައްވާފައެވެ.
އެހެން ނަމަވެސް ޖުޑީޝަލަ ސާވިސް ކޮމިޝަނުން ފަނޑިޔާރުންގެ އިސްތިއުފާ ބަލައިގަނެވޭ ގޮތާއި ވަގުތުތަކާއި ހާލަތްތަކާއި ގުޅޭ ގޮތުން ވިސްނުމެއް ވިސްނަން ޖެހޭ ކަމަށް ފެނިވަޑައިގަންނަވާ ކަމަށާއި އަދި މަޖިލިސް ވެސް އެކަމާއި ވިސްނުން އެއީ ބޭނުންތެރިކަމެއް ކަމަށް ނަޝީދު ވިދާޅުވިއެވެ.
ޖޭއެސްސީގެ ގާނޫނަށް ބަދަލުތަކެއް ގެނައުމަށްފަހު ޖޭއެސްސީ އަށް ބޮޑެތި ބާރުތަކެއް ވަނީ ދީފައެވެ. އެ ބާރުތަކާއި އެކުގައި ޖޭއެސްސީން އަންނަނީ ފަނޑިޔާރުންނާއި ގުޅޭ ގިނަ މައްސަލަތަކެއް ބަލާ ފިޔަވަޅު އަޅަމުންނެވެ.