އަލިފުޅުތުއްތު ފައުންޑޭޝަނުން އައިޖީއެމްއެޗުގަށް ޕީސީއާރު މެޝިނެއް ހަދިޔާކޮށްފިއެވެ.
މި މެޝިން ހަވާލުކޮށްފައިވަނީ މިއަދު އައިޖިއެމްއެޗުގައި ބޭއްވި ހަފްލާއެއްގައިއެވެ. މި މެޝިނުން ހެދެނީ ދުވާލަކު ކިތައް ޓެސްޓު ކަމެއް ނޭނގެއެވެ. އެކަމުގެ ތަފްސީލެއް އައިޖީއެމްއެޗް އަކުން ހާމައެއް ނުކުރެއެވެ. ބުނީ އެ ފައުންޑޭޝަނުން ހަދިޔާކޮށްފައިވަނީ ޕާކިންޕާމާ ބްރޭންޑުގެ ޕީސީއާރް މެޝިނެއް ކަމަށެވެ.
ރާއްޖެ އިން އަލަށް ކޮވިޑް19 ފެނުނުތާ ހަތަރު މަސް ވެފައިވާއިރު، ފެބްރުއަރީ މަހުގެ ފަހުކޮޅުން ފެށިގެން ރާއްޖޭގައި ކޮވިޑް19 އަށް ޕީސީއާރް ޓެސްޓުތައް އަންނަނީ ކުރަމުންނެވެ. އޭރު އަޖީއެމްއެޗް ލެބޯޓްރީގައި އެކަނި ފެށި މި މަސައްކަތް ފުޅާވެ މިހާރު ފުލުހުންގެ ލެބޯޓްރީ އާއި ސެނެހިޔާގެ އިތުރަށް އޭޑީކޭ އިން ވެސް ޕީސީއާރް ޓެސްޓުތައް ހަދަ އެވެ. މީގެ އިތުރަށް ކޮވިޑް19 އަށް އެންޓިބޮޑީ ޓެސްޓުތައް ވެސް ދަނީ ހަދަމުންނެވެ.
އަލިފުޅު ތުއްތު ފައުންޑޭޝަނަކީ މަޝްހޫރު ވިޔަފާރި އާއިލާ ޗަންޕާ ބްރަދާސްގެ ފަސް ބެން ކަމަށްވާ ޗަމްޕާ ހުސައިން އަފީފާއި ޗަމްޕާ މުހައްމަދު މޫސާ (އުއްޗު) އާއި އަބްދުއްސައްތާރު މޫސާ އާއި އަހުމަދު މޫސާ އަދި ހަދީޖާ މޫސާގެ ބައްޕަ، މޫސާ އަލީ (އަލިފުޅު ތުއްތު)ގެ ނަމުގައި އުފައްދާފައިވާ ފައުންޑޭޝަނެކެވެ.
އެ ފައުންޑޭޝަނުންގެ ފަރާތުން ރަށްރަށުގައި ފެނާއި ނަރުދަމާ ގާއިމްކޮށްދިނުމުގެ އިތުރުން ދިވެހި ކުދިންނަށް މަތީ ތައުލީމުގެ ފުރުސަތު ފަހިކޮށްދީ، އެކި ރަށްރަށުގައި މިސްކިތްތައް ދަނީ އަޅައިދެމުންނެވެ.