ޑޮލަރުގެ އަގު ކަޅު ބާޒާރުގައި އިންތިހާއަށް މަތިވެފައިވާ ކަމަށާއި އެހެންކަމުން މަރުކަޒީ ބޭންކް އެމްއެމްއޭގެ ގަވަރުނަރުގެ މަގާމުގައި ހުންނެވި އަލީ ހާޝިމް މަގާމުން ވަކި ކުރުމަށް ގޮވާލާ ރައްޔިތުންގެ މަޖިލީހަށް ކާށިދޫ ދާއިރާގެ މެންބަރު އަބްދުﷲ ޖާބިރު މައްސަލައެއް ހުށަހަޅައިފިއެވެ.
ޖާބިރު ވަނީ ޑޮލަރުގެ އަގު މަތިވަމުން އަންނައިރު ވެސް އެކަމުގައި ގަވަރުނަރު ހަނު ހުންނަވާ ކަމަށް ވިދާޅުވެފައެވެ. މަޖިލީހަށް ޖާބިރު ހުށަހެޅުއްވި މައްސަލާގައި އޭނާ ވަނީ ރާއްޖެއިން ބޭރުގައި އެތަކެއް ދިވެހި ކުދިންނެއް ތައުލީމު ހާސިލު ކުރަމުން އަންނަ ކަމަށާއި އެކުދިންނަށް ޑޮލަރުގެ ބޭނުން ޖެހޭނެ ކަމަށް ވިދާޅުވެފައެވެ.
މީގެއިތުރުން 15.42 ރުފިޔާ އަކީ ޑޮލަރެއް ލިބޭނެ އަގު ކަމަށް ކަނޑައަޅާފައިވީ ނަމަވެސް މިހާރު ޑޮލަރެއްގެ އަގު 20 ރުފިޔާއަށް ކަޅު ބާޒާރުގައި ލިބެމުން ދާތީ އެކަމަކީ ދިވެހި ރައްޔިތުން އިތުރަށް ނިކަމެތިވެގެން ދާނެ ކަމެއް ކަމަށް ޖާބިރު ފާހަގަކުރެއްވިއެވެ.
މިފަދަ ހާލަތެއްގައި ގަވަރުނަރުގެ މަގާމުގައި ހުންނެވި އަލީ ހާޝިމް މަގާމުގެ ޒިންމާ އަދާ ނުކުރެވި ނުކުޅެދިފައިވާ ކަމަށް ޖާބިރު ހުށަހެޅުއްވި ކުއްލި މައްސަލާގައިވެއެވެ.
ޖާބިރު ވަނީ މި މައްސަލާގައި މިއަދު މަޖިލިސް ކުރިމަތީގައި ނޫސްވެރިންނާ ބައްދަލުކުރައްވާ ވެސް ވާހަކަދައްކަވާފައެވެ. އެގޮތުން އެމްއެމްއޭ އިން ޑޮލަރު އަގުބޮޑުވެގެންދާ މި ދަނޑިވަޅުގައި ވެސް އެއްވެސް ކަމެއް ކުރާތަން ނުފެންނަ ކަމަށް ޖާބިރު ވިދާޅުވިއެވެ.