ޝަހީމް، އިމްރާނަށް: ޔާމީނާ މެދު ކަންތައް ރަނގަޅަށް ކުރައްވާ

ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީނާއި މެދު ރަނގަޅަށް ކަންކަން ކޮށް ދެއްވުމަށް ހޯމް މިނިސްޓަރު އިމްރާން އަބްދުﷲ ގެ ކިބައިން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފިއެވެ.

ޝަހީމް ކުރެއްވި ޓްވީޓެއްގައި ވަނީ ރައީސް ޔާމީނަށް ކުރިމަތިވަމުންދާ އިހާނެތި ކަންތައްތަކާއި މެދު ހިތާމަ ކުރައްވާ ކަމަށް ވިދާޅުވެފައެވެ. އަދި ވިދާޅުވީ އިމްރާން ހޯމް މިނިސްޓަރަކަށް ހުންނައިގެން ރައީސް ޔާމީނަށް ދޭތެރޭ މިހާރަށްވުރެ ރަނގަޅަށް ކަންކަން ކުރެއްވޭނެ ކަމަށެވެ. އަދި ރައީސް ޔާމީންގެ ވެރިކަން ނިމުނުއިރުވެސް އިމްރާން ހުންނެވީ ގޭގައިކަން ވެސް ޝަހީމް ވިދާޅުވިއެވެ.

ޝަހީމް މިފަދައިން ވިދާޅުވެފައި މިވަނީ ޔާމީންގެ ވަކީލު ބައްދަލުވުން ހަމަޖައްސަން އެއްވެސް ކޯޓަަކުން އޭނާގެ މައްޗަށް އަމުރެއް ނެރެފައި ނުވާ ކަމަށް އިމްރާން ވިދާޅުވެފައިވުމުން އެކަމުގެ ކަންބޮޑުވުން ރައީސް ޔާމީންގެ އާއިލާއިން ފާޅުކޮށްފައި ވަނިކޮށެވެ.

އިއްޔެ އިމްރާން ވިދާޅުވީ ޔާމީންގެ ވަކީލު ބައްދަލުވުން ހަމަޖައްސަން ރާއްޖޭގެ އެއްވެސް ކޯޓަކުން އޭނާގެ މައްޗަށް އަމުރެއް ނެރުއްވާފައި ނެތް ކަމަށެވެ. އަދި ބައްދަލުވުން ހަމަޖައްސަން މޯލްޑިވްސް ކަރެކްޝަނަލް ސާވިސްގެ އިސްނެގުމަށް ލައްކަ މަސައްކަތް ކުރެވިފައިވާ ކަމަށްވެސް އިމްރާން ވިދާޅުވިއެވެ.

"ބައްދަލުވުން ނުބޭއްވިގެން އުޅެނީ އެކަން ކުރައްވަން ވަކީލު ބޭނުން ނުވާތީ" އިމްރާން ވިދާޅުވިއެވެ.

އެކަމާއި ގުޅިގެން ރައީސް ޔާމީންގެ ދަރިކަލުން ޒޭން އަބްދުﷲ ޔާމީން މިއަދު ނެެރުއްވި ބަޔާނެއްގައި ވަނީ ކްރިމިނަލް ކޯޓާއި ހައި ކޯޓުން ވެސް ކޮށްފައިވާ އަމުރުތަކާ ޚިލާފަށް ވަކީލެއްގެ ހައްގު ބައްޕާފުޅަށް ނުދެނީ ސަރުކާރުން ގަސްދުގައި ކަމަށާއި އެކަމާ މެދު ކަންބޮޑުވާ ކަމަށެވެ.

ބަޔާނުގައި ގާނޫނު އަސާސީގެ 51 ވަނަ މާއްދާއިން ކަށަވަރުކޮށްދީފައިވާ ގާނޫނީ ވަކީލެއް ލިބުމުގެ އަސާސީ ހައްގުން ބައްޕާފުޅު އަދި ކުރީގެ ރައީސް ޔާމީން މަހުރޫމުކޮށްފައިވާ ކަމަށާއި އެއީ ދިވެހިރާއްޖޭގެ ހައިކޯޓުގައި އެމަނިކުފާނުގެ [ރައީސް ޔާމީންގެ] ފަރާތްޕުޅުން ހުށަހަޅުއްވާފައިވާ އިސްތިއުނާފު ޝަރީއަތުގެ އަޑުއެހުމެއްގައި އެކޯޓުގެ ފަރާތުން ދައުލަތުގެ މައްޗަށް ކޮށްފައިވާ އަމުރާ ހިލާފު ކަމެއް ކަމަށް ވިދާޅުވެފައިވެއެވެ.