އައްޑޫގެ މަގުތައް ހެދުމުގެ އަމަލީ މަސައްކަތް އަންނަ ނޮވެމްބަރު މަހު ފެށިގެންދާނެކަމަށް އިންޑިއާ ސަރުކާރުން ބުނެފިއެވެ.
އިންޑިއާގެ އެގްޒިމް ބޭންކުގެ ލޯން އެހީގެ ދަށުން އައްޑޫގެ މަގުތައް ހެދުމަށް ނިންމާފައިވާއިރު، މި މަސައްކަތް އެވޯޑު ކުރުމުގެ މަސައްކަތް މިހާރު ދަނީ ބާރު ސްޕީޑެއްގައި ކަމަށް މައުލޫމާތު ލިބެއެވެ.
އިންޑިއަން ހައި ކޮމިޝަންގެ އިސް އޮފިޝަލަކު މިއަދު "އައްޑޫލައިވް"އަށް ވިދާޅުވީ އައްޑޫގެ މަގުތައް ހެދުމަށް އެގްޒިމް ބޭންކުން މިހާރު ކުރިއަށްގެންދަނީ ޓެންޑަރިންގެ މަސައްކަތެވެ. އަދި ޓެންޑަރިންގެ ފުރަތަމަ ފޭސް މި މަހު އިންޑިއާގައި ކުރިއަށް ގެންދާއިރު ސެޕްޓެމްބަރު މަހުގެ ތެރޭގައި މަސައްކަތް އެވޯޑު ކުރެވޭ ފަރާތް އެނގިގެންދާނެކަމަށެވެ.
މައުލޫމާތު ލިބިފައިވާ ގޮތުގައި އެގްޒިމް ބޭންކުން ވަނީ މި މަސައްކަތް އެވޯޑު ކުރުމުގެ ކްރައިޓީރިއާ މަތިކޮށްފައެވެ. އެގޮތުން މި މަސައްކަތް އެވޯޑު ކުރެވޭ ކުންފުންޏަކީ އިންޑިއާގައި މިމަސައްކަތުގެ ތަޖްރިބާ ލިބިފައިވާ ގާބިލް ކުންފުންޏެއްކަށެވެ.
ހައި ކޮމިޝަނުން ބުނީ އައްޑޫގެ މަގުތައް ރަނގަޅު ކޮލެޓީ ފެންވަރެއްގައި ހެދުމަށް އިންޑިއާ ސަރުކާރުން ނިންމާފައިވާ ކަމަށެވެ.
އިންޑިއާއިން ވަނީ ރާއްޖެއަށް 800 މިލިއަން ޑޮލަރު ލޯން އެހީ ދިނުމަށް ނިންމާފައެވެ. އަދި އައްޑޫގެ މަގުތައް ހެދުމަށް މިލޯން އެހީގެ ދަށުން 120 މިލިއަން ޑޮލަރު ހަރަދުވާނެކަމަށް ލަފާ ކުރެވޭ ކަމަށް ހައި ކޮމިޝަނުން ބުނެއެވެ.