ރާއްޖެއިން ކޮވިޑް19 އަށް މިހާތަނަށް ޕޮޒިޓިވްވެފައިވާ ގިނަ މީހުންނަކީ ވަޒީފާއަކަށް ނުދާ މީހުން ކަމަށް ހެލްތު އިމަޖެންސީ އޮޕަރޭޝަން ސެންޓަރުން ބުނެފިއެވެ.
ރޭ އެޗްއީއޯސީ އިން ބޭއްވި ނޫސްވެރިންގެ ބައްދަލުވުމުގައި ޑޮކްޓަރު އިބްރާހީމް އަފްޒަލް ވިދާޅުވީ ގިނައިން ރާއްޖެއިން ޕޮޒިޓިވްވެފައި ވަނީ ފްރަންޓުލައިންގައި މަސައްކަތް ކުރާ މީހުންނާއި އެއްވެސް މަސައްކަތެއް ނުކުރާ މީހުންނަށް ކަމަށެވެ. މީގެއިތުރުން ފްރަންޓުލައިންގައި މަސައްކަތް ކުރާ މީހުން ކުރާ މަސައްކަތަށް ބަލާނަމަ ބަލިޖެހިފައިވާ ނިސްބަތް މަދުކަން އަފްޒަލް ފާހަގަކުރެއްވިއެވެ.
އަފްޒަލް ވަނީ އެއްވެސް ވަޒީފާއަކަށް ނުދާ މީހުން ކޮންމެހެން ގެއިން ބޭރަށް ދާން ޖެހިގެން ނޫނީ ބޭރަށް ނުދިއުމަށް އެދިފައެވެ. އަފްޒަލް ވިދާޅުވީ ބަލި ޖެހުނު ގޮތް ނޭނގި ތިބި އެތައް ކޭސްތަކެއް އެބަހުރި ކަމަށެވެ.
އިއްޔެ އެކަނިވެސް 146 މީހަކު ރާއްޖެއިން ޕޮޒިޓިވްވިއެވެ. ޕޮޒިޓިވްވި މީހުންގެ ތެރޭގައި ހިމެނެނީ 117 ދިވެހިންނާއި ބަންގްލަދޭޝް 21 މީހަކާއި އިންޑިއާ 2 މީހުންގެ އިތުރުން ލަންކާ ފަސް މީހަކާއި ފިލިޕީންސް ރައްޔިތެކެވެ.
ރާއްޖެއިން ޕޮޒިޓިވްވި މީހުންގެ ޖުމްލަ އަދަދު ވަނީ 6,225 މީހުންނެވެ. މިބައްޔަށް މިހާތަނަށް 2،413 މީހަކު ފަރުވާ ހޯދަމުން އަންނައިރު 3،788 މީހަކު މި ބަލިން ވަނީ ރަނގަޅުވެފައެވެ. އެގޮތުން މިއަދު ވެސް 140 މީހަކު ވަނީ ބަލިން ރަނގަޅުވެފައެވެ.
މި ބަލީގައި މިހާތަނަށް 24 މީހަކު ވަނީ މަރުވެފައެވެ.