މަސްވެރިންނަށް ދޭން ޖެހޭ ފައިސާ ނުލިބި ގިނަ ދުވަސް ވެފައިވާތީ އެކަމާ ހިތް ހަމަ ނުޖެހިގެން ދެކުނުގެ މަސްވެރިންތަކެއް އިހުތިޖާޖުކޮށްފިއެވެ.
މި މަސްވެރިންތައް އިހުތިޖާޖު ކޮށްފައިވަނީ ގއ. ކޫއްޑޫގައެވެ. މަސްވެރިން ކުރިޔަށް ގެންގޮސްފައިވަނީ ސުލްހަވެރި އިހުތިޖާޖެކެވެ. މަސްވެރިން ވަނީ ފިޝަރީޒް މިނިސްޓަރާއި ސަރުކާރުގެ މަސް ކުންފުނި، މިފްކޯގެ އިސްވެރިންގެ އިސްތިއުފާއަށް ގޮވާލައިފައެވެ.
ފުލުހުން ބުނީ ކޫއްޑޫގައި މަސްވެރިންގެ ބަޔަކު އިހުތިޖާޖެއް ކުރަމުންދާ ކަމަށާއި އިހުތިޖާޖެއް ކުރި ނަމަވެސް ހަމަޖެހުމެއް ހިނގާފައި ނުވާ ކަމަށެވެ. އަދި މި މައްސަލަ ހައްލު ކުރަން ގުޅުންހުރި ފަރާތްތަކާއެކު މަޝްވަރާ ކުރަމުން އަންނަ ކަމަށެވެ.
މަސްވެރިން އިހުތިޖާޖު ކުރަނީ އެމީހުންނަށް ލިބެންޖެހޭ ފައިސާތައް ލިބެމުން ނުދާތީއެވެ. ނަމަވެސް މިފްކޯ އިން ބުނީ މަސްވެރިންނަށް ދޭންޖެހޭ ފައިސާތައް ދެމުންދާ ކަމަށާއި ނުދެވި ހުރި ފައިސާތައް ވެސް ހަލާސް ކުރުމުގެ މަސައްކަތް ކުރަމުން އަންނަ ކަމަށެވެ.
އެންމެ ފަހުން މަސްވެރިންނަށް 15 މިލިއަނެއްހާ ރުފިޔާ މިފްކޯ އިން ދޫކޮށްފައިވާއިރު ބާކީ ނުދީ ހުރި 33 މިލިއަން ރުފިޔާވެސް ކުރިޔަށް އޮތް ދުވަސްތަކުގެ ތެރޭގައި ދޭނެ ކަމަށް މިފްކޯ އިން ބުންޏެވެ.