ކުރީގެ ރައީސް މުހައްމަދު ނަޝީދުގެ ވެރިކަމުގައި 2011ވަނަ އަހަރު އިއުލާންކުރި "ވެށިފަހި މާލެ" ޕްރޮގްރާމުގެ ދަށުން ފްލެޓު ގަތުމަށްފަހު ފައިސާ ނުދެއްކިގެން ފްލެޓު ދޫކޮށްލި ފަރާތްތަކަށް ފްލެޓު ދިނުމަށް ނިންމައިފިއެވެ.
ޕްލޭނިން އެންޑް ހައުސިން މިނިސްޓްރީން ކޮށްފައިވާ އިއުލާނެއްގައި ބުނެފައި ވަނީ ގުޅީފަޅުން ފުލެޓުގަތުމަށް ފައިސާ ދައްކަންފަށާފައިވާ ފަރާތްތަކާއި، ވެށިފަހި މާލެ ޕްރޮގްރާމްގެ ދަށުން ގާކޮށި އަދި ވޭސައިޑް އިން ފުލެޓަށް ދައްކަންޖެހޭ ފައިސާ ހަމަނުޖެހުނު ފަރާތްތަކަށް ފުލެޓު ދިނުމަށްޓަކައި އެފަރާތްތަކަށް ދެ ގޮތެއް ހިޔާރުކުރުމުގެ ފުރުސަތު ދީފައިވާ ކަމަށެވެ.
އެގޮތުން ހިޔާ މަޝްރޫޢުގެ 6720 ފުލެޓުގެ ތެރެއިން 2 ކޮޓަރީގެ ފުލެޓެއް ހިޔާރުކުރުން ނުވަތަ ފަހިދިރިއުޅުން ކޯޕަރޭޝަނުން ހުޅުމާލޭގައި ޢިމާރާތްކުރާ 1700 ފުލެޓުގެ ތެރެއިން 3 ކޮޓަރީގެ ފުލެޓެއް ހިޔާރު ކުރުމުގެ ފުރުސަތު ދީފައިވާ ކަމަށް އެ މިނިސްޓްރީން ބުންޏެވެ.
އެ މިނިސްޓްރީން ބުނީ އެ ދެ ގޮތުންކުރެ ގޮތެއް ހިޔާރުކުރުމުގެ ލިޔުމުގައި ސޮއި ނުކޮށް ތިބި ފަރާތްތަކުން މި މަހުގެ 27ވަނަ ދުވަހުގެ 13:00 ގެ ކުރިން ބަންދު ނޫން ކޮންމެދުވަހެއްގެ ހެނދުނު 9:00 އިން 13:00 އަށް އެ މިނިސްޓްރީއަށް ގޮސް ލިޔުމުގައި ސޮއިކުރުމަށް އެދޭ ކަމަށެވެ.ޥ