ޑިފެންސް މިނިސްޓްރީގެ އިމާރާތް އެޅުމަށް އެންމެ ކުޑަ އަގު ހުށަހަޅާފައިވާ ކުންފުންޏަށް ނުދިން ސަބަބު ފިނޭންސް މިނިސްޓްރީން ހާމަކޮށްދީފިއެވެ.
މިނިސްޓްރީން ވަނީ މިދިޔަ އޭޕްރީލް މަހުގެ އެއްވަނަ ދުވަހު ޓެންޑާ ބޯޑު މެދުވެރިކޮށް މަސައްކަތްތައް އެވޯޑު ކުރުމުގައި އަމަލުކުރާނެ އުސޫލެއް ކަނޑައަޅާފައެވެ.
އެ އުސޫލުގައި ބުނެފައިވަނީ ކުންފުންޏަކަށް މަސައްކަތެއް އެވޯޑު ކުރެވޭނީ އެ ކުންފުންޏެއް ނިސްބަތްވާ ގްރޭޑަށް ބަލާ، ކަނޑައަޅާފައިވާ ޖުމުލަ އަގު ނުވަތަ ޖުމުލަ އަދަދަށްވުރެ އެވަގުތު އެ ކުންފުންޏެއް ކުރަމުންދާ ޢިމާރާތްކުރުމުގެ މަސައްކަތްތަކުގެ ޖުމުލަ އަގު ނުވަތަ ޖުމުލަ އަދަދު އިތުރު ނުވާނަމަ ކަމަށެވެ. އެގޮތުން ޖުމުލަ އަގު ހިސާބުކުރުމުގައި ބަލާނީ މަސައްކަތްތައް އެވޯޑްކޮށްފައިވާ އަގަށް ކަމަށް އެ އުސޫލުގައިވެއެވެ.
ފިނޭންސް މިނިސްޓްރީން ބުނީ ޑިފެންސް އިމާރާތް އެޅުމަށް އެސްޖޭއާ ހަވާލުނުކޮށް ދެވަނަ އަށް އެންމެ ކުޑަ އަގެއް ހުށަހެޅި ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑަށް ހަވާލުކުރީ އެ އުސޫލުގެ ދަށުންނެވެ.
ފިނޭންސް މިނިސްޓްރީން ބުނީ ކުންފުނިތަކަށް އެއްފަހަރާ ޓެންޑަރތަކުގައި މަސައްކަތް ކުރެވޭނެ ވަކި އަދަދުތަކާއި ޖުމްލަ ފައިސާގެ އަދަދު ކަނޑައަޅާފައިވާ ކަމަށެވެ. އެ އުސޫލުގެ ދަށުން އެސްޖޭ ކޮންސްޓްރަކްޝަން އަށް އެއްފަހަރާ މަސައްކަތް ކުރެވޭނީ 300 މިލިއަން ރުފިޔާ އާއި ހަމައަށެވެ. އަދި އެއްފަހަރާ މަސައްކަތް ކުރެވޭނެ ޓެންޑަރތަކުގެ އަދަދަކީ ގިނަ ވެގެން 8 ކަމަށް ފިނޭންސް މިނިސްޓްރީން ބުންޏެވެ.
އެގޮތަށް އެ މިނިސްޓްރީން ބުނީ ޓެންޑާ ބޯޑު މެދުވެރިކޮށް މަސައްކަތްތައް އެވޯޑު ކުރުމުގައި އަމަލުކުރާނެ އުސޫލުގައި ކަނޑައަޅާފައިވާ ގްރޭޑުތަކުގެ ތެރެއިން ގްރޭޑު 1 ގައި ބަޔާންކޮށްފައި އޮތް ގޮތުގެ މައްޗަށް ރިއާޔަތްކޮށެވެ. ގްރޭޑު 1 ގައި ބުނެފައިވަނީ އެ ގްރޭޑުގައި ޖެނެރަލް ބިލްޑިން ނުވަތަ ޖެނެރަލް ސިވިލް މަސައްކަތް ކުރުމުގައި ގްރޭޑް އެކެއްގެ ކުންފުންޏަކަށް 300 މިލިއަން ރުފިޔާއާ ހަމައަށް މަސައްކަތް ދެވިދާނެ ކަމަށް ބަޔާންކޮށްފައިވެއެވެ. ގިނަވެގެން ދެވޭނީ 8 މަޝްރޫއުއެވެ.
ފިނޭންސް މިނިސްޓްރީން ބުނީ އެސްޖޭ ކޮންސްޓްރަކްޝަނުން މިހާރުވެސް 310 މިލިއަން ރުފިޔާގެ މަޝްރޫއުގައި ސޮއިކޮށްފައިވާ ކަމަށެވެ. އެއީ ޖުމްލަ 11 މަޝްރޫއު އެއް ކަމަށް ފިނޭންސް އިން ބުންޏެވެ.