މިނިވަން މުއައްސަސާތަކުގެ މެމްބަރުންނަށް މަގާމުގައި ހުރެގެން ވިޔަފާރި ނުކުރެވޭނެ ކަމަށް ބަޔާންކޮށްފައިވާ މާއްދާ އަށް މިނިވަން މުއައްސަސާތަކާ ބެހޭ ރައްޔިތުން މަޖިލީހުގެ ކޮމެޓީން ބަދަލުކޮށްފިއެވެ.
އެންޓި ކޮރަޕްޝަން ކޮމިޝަން (އޭސީސީ) ގެ ގާނޫނާއި ހިއުމަން ރައިޓްސް ކޮމިޝަންގެ ގާނޫނާއި، އޮޑިޓަ ޖެނެރަލްގެ ގާނޫނާއި، އިލެކްޝަންސް ކޮމިޝަންގެ ގާނޫނާއި، ސިވިލް ސާވިސް ކޮމިޝަންގެ ގާނޫނަށް ގިނަ އިސްލާހުތަކެއް ހުށަހަޅާފައެވެ.
އެގޮތުން އިއްޔެ މިނިވަން މުއައްސަސާތަކުގެ ކޮމެޓީން ވަނީ އޭގެތެރެއިން ތިން ބިލެއް ފާސްކޮށްފައެވެ. އެ ބިލު ފާސްކުރިއިރު ބިލަށް ބައެއް ބަދަލުތައް ވަނީ ގެނެސްފައެވެ.
އެގޮތުން އެ ބިލު މަޖިލީހަށް ހުށަހެޅިއިރު އެއްވެސް މެންބަރެއްގެ މަސްލަހަތު އޮންނަ ކަންކަމުން ނުވަތަ މައްސަލަތަކުން އެ މެންބަރެއް ދުރުވާން ޖެހެއެވެ. އިތުރު އާމްދަނީއެއް ހޯދުމަށް މަސައްކަތް ކުރުމަކީ މަނާ ކަމެކެވެ. އެގޮތުން އަމިއްލަ ވިޔަފާރިއެއް ނުވަތަ ވިޔަފާރީގެ އުސޫލުން އެއްވެސް ކަމެއް މެމްބަރަކު ކުރައްވައިގެން ނުވާނެ ކަމަށް ވެސް އިސްލާހުގައިވެއެވެ. ނަމަވެސް އިއްޔެ ކޮމެޓީން ވަނީ އެ މާއްދާ ބަދަލުކޮށް މެންބަރުންނަށް ވިޔަފާރު ކުރެވޭނެ ގޮތަށް ބަދަލުކޮށްފައެވެ.
އެ ބިލުގައި މެންބަރުންގެ މާލީ ބަޔާން ހުށަހެޅުމުގެ އިތުރުން އެ މެންބަރުންގެ އާއިލީ މެންބަރުން [އަނބިން / ފިރިން އަދި ދަރިން] ގެ މާލީ ބަޔާން ހުށަހަޅަންޖެހޭނެ ކަމަށް ވެސް ބަޔާންކޮށްފައިވެއެވެ.