ހެލްތު މިނިސްޓްރީ އާއި ފުލުހުން ގުޅިގެން ރާއްޖޭގައި ނޭޝަނަލް އެމްބިއުލާންސް ސާވިސްގެ ޚިދުމަތް ފެށުމަށް ވަމުންދާ ތައްޔާރީތަކުގެ ދަށުން މުވައްޒަފުން ތަމްރީނުކުރުމުގެ އެއްދުވަހުގެ ޕްރޮގްރާމެއް ހިންގައިފިއެވެ.
އިއްޔެ ވިލިމާލޭ ޕޮލިސް ސްޓޭޝަންގައި ކުރިއަށް ގެންދިޔަ އެ ތަމްރީނު ޕްރޮގްރާމުގައި މަޢުލޫމާތު ފޯރުކޮށްދިނީ މޯލްޑިވްސް ޕޮލިސް ސާވިސް އާއި މޯލްޑިވްސް ރެޑްކްރޮސެންޓާއި މޯލްޑިވްސް ނޭޝަނަލް ޑިފެސް ފޯސްގެ އިންސްޓްރަކްޓަރުންނެވެ.
އެގޮތުން މޯލްޑިވްސް ރެޑްކްރޮސެންޓުން ކުރިއަށް ގެންދިޔަ ސެޝަންތަކުގައި، ކުއްލި ނުރައްކަލުގެ ހާލަތުގައި އަވަސް ފަރުވާ ފޯރުކޮށްދިނުމާއި ބަލިމީހުން އުފުލުމާއި އެއްތަނުން އަނެއް ތަނަށް ބަލި މީހުން ގެންދިއުމާއި، އުސް އިމާރާތްތަކުން ބަލި މީހުން ސްޓްރެޗަރުގައި ބޭލުންފަދަ ކަންކަމަށް ތަމްރީން ކުރުމުގެ އިތުރުން މީހުންނަށް ފުރަތަމަ އެހީ ފޯރުކޮށްދޭނެ ގޮތުގެ އަމަލީ ތަމްރީނުތައް ކުރިއަށް ގެންގޮސްފައިވެއެވެ.
މީގެ އިތުރުން ކުރިއަށް ގެންދިޔަ ސެޝަންތަކުގެ ތެރޭގައި ބަލި މީހުންނާއި މުއާމަލާތުކުރާނެ ރަނގަޅު ގޮތްތައް ބުނެދިނުމާއި، ކުއްލި ހާލަތުގައި އަމަލުކުރާނެ އުސޫލުތަކާއި، އެފަދަ ހާލަތްތަކުގައި އަންނަ ކޯލްތަކަށް ވީ އެންމެ އަވަހަކަށް ޖަވާބުދާރީވާނެ ގޮތްތަކާ ބެހޭގޮތުންވެސް މައުލޫމާތުދީފައިވެއެވެ.
އަދި ޓްރެފިކް މެނޭޖްކުރުމާއި، އެމްބިއުލާންސް ދަތުރުކުރާ ވަގުތުތަކުގައި އެހެނިހެން އުޅަނދުތައް އެންބިއުލާންސަށް ތަންދެއްކުމާއި ސަމާލުކަންދޭންވީ ކަންކަމާ ގުޅޭގޮތުން މައުލޫމާތު ދިނުމުގެ އިތުރުން މަގު ބަންދު ކުރަން ޖެހިއްޖެ ހާލަތުގައި އަމަލު ކުރާނެ ގޮތުގެ މަޢުލޫމާތުވެސް ފޯރުކޮށްދީފައިވެއެވެ. މީގެ އިތުރުން އަލިފާނުގެ ހާދިސާތަކުގައި އަމަލުކުރާނެގޮތުގެ މައުލޫމާތުދީ އެކަމުގެ ތަމްރީނުތައް ވެސް ކުރިއަށް ގެންގޮސްފައިވެއެވެ.
މިތަމްރީނު ޕްރޮގްރާމުގައި ޖުމްލަ 40 މީހުން ބައިވެރިވެފައިވެއެވެ. އޭގެ ތެރޭގައި ނޭޝަނަލް އެމްބިއުލާންސް ސާވިސްގެ ހިދުމަތަށް ރެކްރޫޓްކުރެވޭ މުވައްޒަފުންގެ އިތުރުން ރެޑްކްރޮސެންޓްގެ ވޮލަންޓިއަރުންވެސް މި ތަމްރީނު ޕްރޮގްރާމުގައި ބައިވެރިވެ ތަމްރީނު ފުރިހަމަކޮށްފައިވެއެވެ.