މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ބޯޑަށް ހަތަރު ބޭފުޅަކު އައްޔަން ކުރަން ރުހުން ދޭން ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި ހަތަރު ބޭފުޅުން އައްޔަން ކުރުމަށް ރުހުން ދީފައިވަނީ ވޯޓުގައި ބައިވެރިވެވަޑައިގެންނެވި މެންބަރުން އަގުލަބިއްޔަތުންނެވެ. މީރާގެ ބޯޑަށް އައްޔަން ކުރަން ރުހުން ދިން ބޭފުޅުންނަކީ މުމްތާޒް އަބްދުއްރަޝީދާއި ލީނާ މުހައްމަދު ޒާހިރު ހުސެއިނާއި ހުޝާމް ވަހީދާއި އައިޝަތު އަޝާ އަލީއެވެ.
މީރާގެ ބޯޑަށް ކުރިމަތިލުމުގެ ފުރުޞަތު ހުޅުވައިލުމުން 8 ފަރާތަކުން ވަނީ ބޯޑަށް ނަން ހުށަހަޅާފައެވެ. ނަމަވެސް މިމައްސަލަ ދިރާސާކޮށް އިޤްތިޞާދީ ކޮމިޓީން ނިންމީ 8 ނަމުގެ ތެރެއިން ތެރެއިން 5 ނަމަކަށް ރުހުން ދޭން ފެންނަކަމަށެވެ.
މީރާގެ ބޯޑުގައި ތިއްބަވާނީ ހަތް މެމްބަރުންނެވެ. އެއީ ރައީސުލްޖުމްހޫރިއްޔާ ޢައްޔަނުކުރައްވާ ފަސް މެމްބަރަކާއި ފިނޭންސް މިނިސްޓަރު ކަނޑައަޅުއްވާ މެމްބަރަކާއި ކޮމިޝަނާ ޖެނެރަލް އޮފް ޓެކްސޭޝަން އެވެ.