ސިވިލް ސާވިސް ކޮމިޝަން (ސީއެސްސީ) އަށް ކުރިމަތިލި ފަރާތްތަކުގެ ނަންތައް ދިރާސާކުރިއިރު ތިނަދޫ ދެކުނު ދާއިރާގެ އެމްޑީޕީގެ މެމްބަރު އަބްދުﷲ ސަނީފްގެ މަސްލަހަތު ފުށުއަރާ ކަމެއްގައި ބައިވެރިވެވަޑައިގެންފައި ނުވާ ކަމަށް މަޖިލީހުގެ އިމްތިޔާޒު އަދި ސުލޫކު ކޮމިޓީން ނިންމައިފިއެވެ.
ކޮމެޓީން އެގޮތަށް ނިންމާފައި ވަނީ ސީއެސްސީ އައްޔަން ކުރުމަށް އެ ކޮމެޓީން މަޖިލީހުގެ ތަޅުމަށް ފޮނުވި ލިސްޓު އެކުލަވާލި ގޮތް ބަލައި ދިނުމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފައިވާތީއެވެ.
ސީއެސްސީއަށް ކުރިމަތިލުމަށް ހުޅުވާލުމުން ވަރަށް ބޮޑު ތަރުހީބެއް ލިބުނެވެ. މުއްދަތު ހަމަވިއިރު އެ މަގާމަށް 41 ބޭފުޅަކު ވަނީ ކުރިމަތިލާފައެވެ. ކޮމެޓީން ވަނީ މި ހުރިހާ ބޭފުޅުންނާއި ވެސް އިންޓަވިއު ކުރައްވާ 15 ނަމެއް ތަޅުމަށް ފޮނުވާފައެވެ. އޭގެތެރެއިން ދެ ބޭފުޅަކު ވަނީ ޑިސްކޮލިފައި ކޮށްފައެވެ. އެއީ ސީއެސްސީގެ ގާނޫނުގައި ބުނެފައިވާ ޑިގްރީއެއް އެބޭފުޅުން ހަދާފައި ނުވުމުންނެވެ.
ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނަޝީދު ވިދާޅުވީ ކޮމެޓީން ނަންތައް ދިރާސާކުރިއިރު މަޖިލީހުގެ މެންބަރެއްގެ މަސްހަލަތު ހިމެނޭ ކަމަށް އެމަނިކުފާނަށް ގަބޫލުކުރެވޭ ކަމަށެވެ. އެހެންކަމުން މަޖިލީހުގެ އިމްތިޔާޒު ކޮމެޓީން އެ މައްސަލަ ބަލައި ދިނުމަށް ވަނީ އެދިފައެވެ.
"ހާއްސަކޮށް މިނިވަން މުއައްސަސާ ކޮމިޓީގެ މެމްބަރެއްގެ މަސްހަލަހަތު ހިމެނޭ ބޭފުޅެއްކަމަށް އަޅުގަނޑުގެ ޒަމީރު ގަބޫލު ކުރެވެނީ ބޭފުޅަކު އިންނެވީތީ އަޅުގަނޑު އެދެނީ ސުލޫކާއި އިމްތިޔާޒް ކޮމިޓީން އަދި އެއް ފަހަރު މިކަން ބައްލަވައިލަދެއްވުމަށް،" ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހަށް ރައްޔިތުންގެ އިތުބާރު ބޮޑުވެގެން ދާނީ ދެފުށް ފެންނަ ގޮތަކަށް އެއްވެސް ފަރާތަކަށް ނުޖެހި އެއްވެސް ބޭފުޅެއްގެ މަސްލަހަތަށް ވެސް ބެލުމެއް ނެތި ކަންކަން ކުރުމުން ކަމަށް ރައީސް ނަޝީދު ވިދާޅުވިއެވެ.
އެވާހަކަ އަށް ރައްދު ދެއްވަމުން މިނިވަން މުއައްސަސާ ކޮމެޓީގެ މުގައްރިރު އަދި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ ސީއެސްސީގެ މެންބަރު ކަމަށް ކުރިމަތިލެއްވި ބޭފުޅުންގެ ނަންތައް ދިރާސާ ކުރެއްވިއިރު މަސްލަހަތު ހިމެނޭ ކޮމެޓީގެ އެއްވެސް މެންބަރަކު ބައިވެރިވެވަޑައިގެންފައި ނުވާނެ ކަމަށެވެ.
އެ މައްސަލާގައި ކޮމެޓީން ރުހުން ދެއްވި ބޭފުޅުންގެ ތެރޭގައި ސަނީފްގެ ކުރީގެ އަނބިކަނބަލުން ހިމެނިވަޑައިގަންނަވައެވެ. ސަނީފުގެ މަސްލަހަތު ފުށުއަރާ ކަމެއް ނެތް ކަމަށް ނިންމީ މެމްބަރުންގެ އިއްތިފާގުންނެވެ. އެހެންނަމަވެސް އެފަދަ މައްސަލަތަކުން މެންބަރުން ތަނާޒުލްވާން ޖެހޭ ގޮތަށް ގަވާއިދު އިސްލާހު ކުރުމަށް ވަނީ ނިންމާފައެވެ.