މިވަގުތު ހަނގުރާމަ ކުރަންވީ ކޮރޯނާ ވައިރަހާ ދެކޮޅަށް ކަމަށް ހެރިޓޭޖު މިނިސްޓަރު ޔުމްނާ މައުމޫން ވިދާޅުވެއްޖެއެވެ.
ޔުމްނާ މިފަދައިން ވިދާޅުވެފައި މިވަނީ ބައްޕާފުޅު އަދި ކުރީގެ ރައީސް މައުމޫން އަބްދުލްގައްޔޫމް، އެމަނިކުފާނުގެ ހަޔާތްޕުޅުގައި ހުރިހާ ވޯޓެއްގައިވެސް މަކަރު ހަދާ އޮޅުވާލާފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވުމުން އެކަމަށް އެކަމަނާގެ ބައްޕާފުޅާއި އަދި ކޮއްކޯފުޅު ގައްސާން މައުމޫން ނަޝީދަށް ރައްދު ދެއްވާފައިވާ ދަނޑިވަޅެއްގައެވެ.
ޔުމްނާ ކުރެއްވި ޓްވީޓެއްގައި ވިދާޅުވީ މި ވަގުތު ހަނގުރާމަ ކުރަންވީ ކޮރޯނާ ވައިރަހާ ކަމަށާއި މަސައްކަތް ކުރަންވީ މި ވަބާއިން ޤައުމު ސަލާމަތް ކުރުމަށް ކަމަށެވެ.
މި ވަގުތު އަޅުގަނޑުމެން ހަނގުރާމަ ކުރަންވީ ކޮރޯނާ ވައިރަހާ. މަސައްކަތް ކުރަންވީ މި ވަބާއިން ޤައުމު ސަލާމަތް ކުރުމަށް. #PhysicalDistancing #WearAMask #washyourhands #fightcorona
— Yumna Maumoon 🇲🇻 🤝🇵🇸 (@yumna_maumoon) August 25, 2020
ނަޝީދު ރޭ ވަނީ މައުމޫންގެ ހަޔާތްޕުޅުގައި ކޮންމެ ވޯޓެއްގައި ވެސް މަކަރު ހަދާފައިވާ ކަމަށް ތުހުމަތު ކުރައްވާފައެވެ. އެއާއެކު މައުމޫން ކުރެއްވި ޓްވީޓެއްގައި ވަނީ 30 އަހަރުގެ ތެރޭގައި އައި ހުރިހާ އިންތިޚާބެއް އޮޅުވާލި އިރު 2008 ގެ އިންތިޚާބު އޮޅުވާނުލެވުނީ ކީއްވެގެންތޯ ސުވާލުކުރައްވާފައެވެ. އަދި ބުއްދި ޤަބޫލުކުރާ ޖަވާބެއް ދެއްވުމަށް ވެސް މައުމޫން ވަނީ ގޮވާލައްވާފައެވެ.
ނަޝީދަށް ރައްދު ދެއްވާ ގައްސާން ކުރެއްވި ޓްވީޓެއްގައި ވިދާޅުވީ ވޯޓަކުން ބަލިވާ ކޮންމެ ފަހަރަކު އަނެއްކޮޅުން އޮޅުވާލީ ކަމަށް އަދި އިސްތިއުފާ ދިނުމަށްފަހު ބަޣާވާތެއް ކަމަށް އަދި ވެރިކަމާއި މަޖިލީހާއި ހުރިހާ ބާރެއް ލިބި ނުހިންގުމުން އެކަން ކުރީ ސަރުކާރު ނޫނީ ކޯލިޝަނަށް ޖަހަމުންދާ ކަމަށެވެ.
"ދޮގު ހެދުން ނޫން ކަމެއް ނުދަންނަ މީހެއްގެ ބަސް ދިވެހިން ދެން ގަބޫލެއް ނުކުރާނެ" އޭނާ ވިދާޅުވިއެވެ.