ރިލެކްސް ފެރީ ސާވިސްގެ ފަރާތުން އައްޑޫ، ފުވައްމުލައް، އަދި ހުވަދޫ އާއި ދެމެދު ހައި ސްޕީޑު ފެރީގެ ހިދްމަތް ފަށައިފިއެވެ.
ރިލެކްސް ފެރީ ސާވިސްގެ ފަރާތުން އައްޑޫ، ފުވައްމުލައް އަދި ހުވަދޫއަށް ދަތުރު ފަށާފައިވަނީ 60 މީހުންގެ ޖާގަ ހިމެނޭ ހައި ސްޕީޑު ލޯންޗެއްގައެވެ.
250ގެ 5 އައުޓުބޯޑު އިންޖީނު އަޅާފައިވާ މި ހައި ސްޕީޑު ފެރީގެ ދަތުރުތައް ހަފްތާއަކު ހަތަރު ދުވަހު ފުވައްމަލަކަށް ބާއްވާއިރު ހަފްތާއަކު ދެދުވަހު ހުވަދޫއަށް ބާއްވަން ވަނީ ނިންމާފައެވެ.
ރިލެކްސް ފެރީ ސާވިސްއިން ވަނީ މިމަހުގެ 24 ވަނަ ދުވަހު ދަތުރުތައް ފަށާފައެވެ. އަދި މިމަހުގެ 27 ވަނަ ދުވަހު ދެވަނަ ދަތުރު ބޭއްވުމަށް އަންނަނީ ތައްޔާރުވަމުންނެވެ.
ރިލެކްސް ފެރީއިން ބުނީ އައްޑޫ އިކުއިޓޯރިއަލް ހޮސްޕިޓަލަށް ޑޮކްޓަރަށް ދައްކަން އަންނަން ބޭނުންފުޅުވާ ހުވަދޫ އަދި ފުވައްމުލަކުގެ ރައްޔިތުންނަށް މިއީ ފަސޭހަ ފުރުސަތަކަށް ވެގެންދާނެކަމަށެވެ.
"އަޅުގަނޑުމެންގެ ފެރީ ދަތުރުތައް މިފަށަނީ މަރަދޫ ބަނދަރުން، ދެން ފުވައްމުލަކަށް، ފުވައްމުލަކުން ވާދޫއަށް، ވާދޫން ފަރެސް މާތޮޑާއަށް އަދި ފަރެސް މާތޮޑާއިން މަޑަވެލިއަށް ދެން ތިނަދޫއަށް، އައްޑޫއަށް ދަތުުރުތައް ފަށާނީ ތިނަދޫން، އެގޮތަށް ޝެޑިއުލް ރޭވިފައި މިވަނީ"
ރިލެކްސް ފެރީ ސާވިސްއިން ވަނީ ދަތުރުތަކުގެ އަގުވެސް ކަނޑައަޅާފައެވެ. އެގޮތުން އައްޑޫ އާއި ފުވައްމުލަކާއި ދެމެދު އެއްކޮޅު ދަތުރުގެ އަގަކީ 300 ރުފިޔާއެވެ. އައްޑޫން ވާދޫ، އަދި ފަރެސް މާތޮޮޑާ އަށް 700 ރުފިޔާއެވެ. އައްޑޫން މަޑަވެލި އަދި ތިނަދޫއަށް އެއްކޮޅު އަގަކީ 800 ރުފިޔާއެވެ.
މީގެ އިތުރުން ހުވަދު އަތޮޅު އުތުރުބުރި އަދި ދެކުނު ބުރި ދެމެދު 50 މީހުންގެ ޖާގައިގެ ފެރީއެއް އޮޕަރޭޓު ކުރާނެކަމަށްވެސް ރިލެކްސް ފެރީ ސާވިސްއިން ވަނީ ބުނެފައެެވެ. މި ފެރީ ސާވިސް މެދުވެރިކޮށް ގއ.ގެ ރަށްތަކުގެ މީހުންނަށް އައްޑޫ އަދި ފުވައްމުލަކަށް ދަތުރު ކުރެވޭނެކަމަށް ރިލެކްސް ފެރީ ސާވިސް އިން މައުލޫމާތުދެއެވެ.
ރިލެކްސް ފެރީ ސާވިސްއިން ބުނީ އެ ފެރީގައި ދަތުރުކުރައްވަން ބޭނުންފުޅުވާ ފަރާތްތަކުން 7731759 ނުވަތަ 7582665 ގުޅައިގެން ބުކިން ހެދޭނެ ކަމަށެވެ.