ކޮވިޑް19 ގެ މި ހާލަތުގައި ވެސް ރާއްޖެއަށް ކުރިޔަށް މިއޮތް ފަހުން ފެށިގެން ޑިސެމްބަރު މަހުގެ ނިޔަލަށް ކޮންމެ މަހަކުވެސް 120.000 ފަތުރުވެރިން އަންނާނެ ކަމަށް ލަފާ ކުރެވޭ ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމުގައި ވާހަކަދައްކަވަމުން މައުސޫމް ވިދާޅުވީ ބޯޑަރު ހުޅުވާލުމާއެލު މިމަހުގެ ނިޔަލަށް 6000 ފަތުރުވެރިން އަންނާނެ ކަމަށެވެ. މިހާރު ރާއްޖޭގެ ހާލަތު ރަނގަޅުވެއްޖެ ނަމަ އިތުރު ފަތުރުވެރިން ރާއްޖެ އަންނާނެ ކަމަށާއި މިއަހަރުގެ ބާކީ އޮތް ދުވަސްތަކުގައި އަންނާނެކަމަށް އަންދާޒާ ކުރެވޭނީ 120،000 ފަތުރުވެރިން ރާއްޖެ އައުން ކަމަށް މައުސޫމް ވިދާޅުވިއެވެ.
"މިހާރު ހުންނަ ރޭޓުން އެއްލައްކަ ވިހާސް ޓުއަރިސްޓުން އަންނަ އިރު އޭގެ މާނައަކީ ދެލައްކަ ސާޅިސް ހާސް ޓުއަރިސްޓުންނޭ. އަޅުގަނޑުމެން އަންދާޒާ ކުރަނީ 14 ދުވަހަށް ތިބޭނެ ކަމަށް. ގެސްޓުން އަންނަ އަދަދާ ތިބޭ އަދަދަދުން މާ ބޮޑު މާނައެއް ނެތް. އަޅުގަނޑުމެން ބަލަންޖެހޭނީ ކިހާ ޑޮލަރެއް ހަރަދުވޭތޯ." މައުސޫމް ވިދާޅުވިއެވެ.
ފަތުރުވެރިން ރާއްޖޭގައި ހޭދަކުރާ މުއްދަތު މަދު ނަމަވެސް މިހާރު ރާއްޖޭގައި ހޭދަކުރާ ދުވަސްތައް އިތުރުކަމަށާއި މުސްތަގުބަލުގައި ވެސް ފަތުރުވެރިން ރާއްޖޭގައި ހޭދަ ކުރާ ދުވަސްތައް އިތުރުވާނެ ކަމަށް އުއްމީދު ކުރާ ކަމަށް މައުސޫމް ވިދާޅުވިއެވެ.
ރާއްޖެއަކީ ފަތުރުވެރިންނަށް ރައްކާތެރި ގައުމެއްކަމުގެ މެސެޖު ދޭން ޖެހޭ ކަމަށާއި މިކަން ކުރެވެން އޮތީ ރާއްޖެއިން ކޮވިޑު ޖެހޭ މީހުންގެ އަދަދު މަދުކުރެވިގެން ކަމަށް މައުސޫމް ވިދާޅުވިއެވެ.