މާލޭގެ ހެންވޭރުގައި ހުރި ގެއެއްގައި މިދިޔަ އަހަރު ހިނގި އަލިފާނުގެ ބޮޑު ހާދިސާގައި އަމިއްލަ ގެއަށް ލިބުނު ގެއްލުންތަކުގެ ސަބަބުން ދިރިއުޅުމަށް ދަތިވެފައިވާ ފަރާތްތަކަށް ސަރުކާރުން ދީފައިވާ ވަގުތީ ބޯހިޔާވަހިކަމުގެ މުއްދަތު ތިންމަސް ދުވަހަށް އިތުރު ކޮށްދީފިއެވެ.
ނޭޝަނަލް ޑިޒާސްޓާ މެނޭޖުމަންޓު އިން ކޮށްފައިވާ ޓްވީޓެއްގައި ބުނީ ހ.ތިލަފުށިގޭގައި ހިނގި އަލިފާނުގެ ހާދިސާއާއި ގުޅިގެން އެ އޮތޯރިޓީ އިން ވަގުތީހިޔާ ފޯރުކޮށް ދެމުން ގެންދާ އާއިލާތަކަށް ދީފައިވާ މުއްދަތު މިމަހުގެ ނިޔަލަށް ހަމަވާނެ ކަމަށެވެ. މިހާރުގެ ހާލަތަށް ބަލައި އެމުއްދަތު ސަރުކާރުން އިތުރު ތިން މަސްދުވަހަށް އިތުރު ކޮށްދީފައިވާ ކަމަށް އެންޑީއެމްއޭ އިން ބުނެފައިވެއެވެ.
މި ހާދިސާގައި ޖުމްލަ 29 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވެއެވެ. އަދި މީގެކުރިން އެންޑީއެމްއޭ އިން ބުނެފައި ވަނީ 8 މިލިއަނަށްވުރެ ގިނަ ރުފިޔާގެ އެހީތެރިކަން ވެސް ފޯރުކޮށްދީފައިވާ ކަމަށެވެ.
މި ހާދިސާއަކީ މާލޭގައި މިފަހުގެ ތާރީހެއްގައި ހިނގާދިޔަ އެންމެ ބިރުވެރި އަދި ނުރައްކާތެރި އަލިފާނުގެ ހާދިސާއެވެ. އެ ހާދިސާގައި ހަ ގުދަނަކާއި، ހަ ގެއެއް ބޭނުން ނުކުރެވޭ ވަރަށް ގެއްލުންވެފައިވެއެވެ.