(އޮގަސްޓް 22، 2013 ވަނަ ދުވަހުގެ ބަޔާ ގުޅޭ)
ސަވާދުގެ މޫނު ވަނީ އޭނާ އެންމެ ލޯބިވާ ޝާޔާގެ މޫނާ ވަރަށް ކައިރިކޮށްފަ އެވެ. ބަލާކަށް ނުހުރެ ސަވާދު ޝާޔާގެ ހަށިގަނޑުގައި އަތްލައި މޫނަށް ދޮނެއް ދިނެވެ.
ނަމަވެސް ޝާޔާގެ ހަށިގަނޑު އާދަޔާހިލާފަށް ހޫނެވެ. އެ ރީތި ސާދަ ވިލޭރޭގެ ހަނދެއް ފަދަ މޫނު ވަނީ މިލައިފަ އެވެ. މަޑު ރަތް ކުލައިގެ ތުނިތުނި ދެ ތުންފަތް ވަނީ ހިކިފަ އެވެ. އެ އަސަރު ގަދަ ސާފު ދެ ލޮލުގެ އުޖާލާކަން ވަނީ ކެނޑިފަ އެވެ.
ޝާޔާގެ މޫނަށް ބަލަހައްޓައިގެން ހުރެ ސަވާދު އެތައް ފަހަރަކު ގޮވައިލައިފި އެވެ. ނަމަވެސް ޝާޔާ ހުރީ ލޯ މަރައިގެންނެވެ. އެ ހިތުގައި ވަނީ ބިރުވެރިކަމެވެ. ކިތަންމެ ބޭނުން ނުވިޔަސް މިއަދު ޝާޔާއަކަށް ކުރެވޭނެ އެއްވެސް ކަމެއް ނެތެވެ.
ހަޅޭއްލެވިޔަސް އެ އަޑު އިވޭނެ އެކަކު ވެސް ނެތެވެ. ޝާޔާ ދެ ލޯމަރައިގެން ހުއްޓަސް އެ ފަކީރުގެ ދެ ލޮލުން ފުރި އުތުރިގެން ކަރުނަތައް ކުލަ މަރުވެފައިވާ ކޯތާފަތް މައްޗަށް އޮހޮރެމުން ދެ އެވެ. އޭނާގެ މޫނުމަތީގައި ކުދި ކޮކާތަކެއް ބުރާލުމަށް ފަހު ވީނުވީއެއް ނޭގުނެވެ.
ނަދާގެ ފޯން ކޯލަށް ފަހު ސަކީނާ އާއި ޔޫސުފްގެ އިތުރުން ޝަރީފާ ވެސް ދިޔައީ ހޮސްޕިޓަލަށެވެ. ކާރުމަތީގައި އެއްވެސް މީހަކު ވާހަކައެއް ނުދައްކަ އެވެ. ހީވަނީ ދުވަހަކު ވެސް ނުދައްނަ ބަޔަކު ހެންނެވެ. ނަމަވެސް ސަކީނާގެ ހިތުގައި ވަނީ އަލިފާން ރޯވެފަ އެވެ. ޔޫސުފަކީ ކޮން ކަހަލަ ފިރިއެއް ހެއްޔެވެ؟ ސަކީނާގެ މުޅި ދިރިއުޅުން ބަރުބާދުކޮށްލައިފި އެވެ.
ހޮސްޕިޓަލަށް ދެވުނު އިރު ނަދާ ހޮސްޕިޓަލްގެ އަވަސް ފަރުވާދޭ ކޮޓަރި ދޮރު ކުރިމަތީގައި ދެކޮޅަށް ހިނގާލަ ހިނގާލަ ހުއްޓެވެ. ނަދާގެ މޫނުން ވަނީ ހާސްކަމާއި ކަންބޮޑުވުމެވެ. ނަދާ ފެނުމާ އެކު ސަކީނާ އަށް ރަނގަޅަވެސް ރޮވުނެވެ. ސަކީނާގެ ހިތުގެ ތެޅުން އަވަސްވެގަތެވެ. އަދި ނަދާގެ ކައިރީގައި ގިސްލަމުން ސަކީނާ އަހާލެވުނެވެ.
"ކޮބާ ނާހިލް…ނާހިލް އަށް ކިހިނެތްވީ؟"
ނަދާއަކަށް އެ ސުވާލަކަށް ދޭނެ ޖަވާބެއް ނޭގުނެވެ. އޭނާ އިނގިލި ދިއްކުރީ އަވަސް ފަރުވާދޭ ކޮޓަރި އާ ދިމާލަށެވެ. ޔޫސުފް މަޑުމަޑުން އަވަސް ފަރުވާދޭ ކޮޓަރީގެ ދޮރުގައި ހިފައިލި އެވެ.
ދޮރު ހުރީ އެތެރެއިން ތަޅުލައިފައެވެ. ސަކީނާގެ ހިތަށް ގޮތް ނޭނގެ ބިރުވެރިކަމެއް ދިޔައީ ވެރިވަމުންނެވެ. ކުޑަ އިރުކޮޅަކުން އަވަސް ފަރުވާދޭ ކޮޓަރި ދޮރު ހުޅުވައިލާފައި އެތެރޭން ޑޮކްޓަރު ނިކުތުމަށް ފަހު ނާހިލްގެ ބެލެނިވެރިއަކީ ކޮބައިތޯ އަހާލި އެވެ.
ޔޫސުފް ޖަވާބު ދިނުމުގެ ގޮތުން ކިހިނެތް ވީހޭ އަހައިލި އެވެ. އެ ވަގުތު ޑޮކްޓަރު ޔޫސުފަށާއި ނާހިލްގެ މަންމަ ސަކީނާ އަށް ދިން ޚަބަރަކީ ނާހިލްގެ ހާލު ރަނގަޅު ނޫން ކަމަށާއި ބޮޑު އޮޕަރޭޝަނެއް ކުރަން ޖެހޭ ކަމަށެވެ. އަދި އޮޕަރޭޝަން ކުރެވޭނީ ބައި ގަޑި އިރު ފަހުން ކަމަށާއި ޔޫސުފް އެތެރެ އަށް ވަނުމަށް ހުއްދަ ދެއްވި އެވެ.
ހެނދުނު 10:00 ޖެހި އިރު މާދިން ހޭލައިގެން ސާދާ ނުހޭލާތީ ސިޓިން ރޫމްގައި މަޑުކޮށްލައިގެން އިންދާ ކުއްލިއަކަށް ގޭގެ ކައިރިއަށް ކާރެއް މަޑުކޮށްލި އަޑު މާދިން އަށް އިވުނެވެ.
ކާރުގެ ދޮރުފަތް ޖެހުނު އަޑާ އެކު ގޭގެ ދޮރޯށި ހުޅުވާލާފައިވަން މީހަކު މާދިން އަށް ފެނުނެވެ. އެ މީހަކު މާދިން އަށް ފެނުމުން މާދިންގެ ހިތް ބާރަށް ތެޅެން ފަށައިފި އެވެ. އެ މީހެއްގެ މޫނުމަތިން ފެންނަނީ އުފާވެރިކަމެވެ. ނަމަވެސް މާދިން ހިތް ވަނީ އަމިއްލަ އަށް ވެސް ކޮންޓްރޯލް ނުވެވޭނެ ހިސާބަށް ގޮސްފަ އެވެ.
އެ މީހަކު އައިސް ސިޓިން ރޫމްތެރެއަށް ވަދެ މާދިންގެ ކުރިމަތީގައި މަޑުކޮށްލިއެވެ. މާދިން އިނީ މުޅިން ހިމޭންވެ ގަނބުވެފައި އިންނަ ކަހަލަ ގޮތަކަށެވެ.
ބޭރުން އައި މީހާ ވަރަށް އަސަރުން ފުރިގެންވާ އަޑަކުން މާދިން އަށް ގޮވައިލި އެވެ. އެ ވަގުތު ބުނެދޭން ނޭނގޭ ކަހަލަ ފޮނިފޮނި އިހުސާސްތަކެއް މާދިންގެ ހިތަށް ކުރުވި އެވެ. މާދިން ހީކުރީ ޙަޔާތުގެ ބާކީ ދުވަސްތައް އުފާވެރިކަމުން ފުރިގެންވާ ތަނަވަސް މާޙައުލެއްގައި ވޭތުކުރުމުގެ ފުރުޞަތު ލިބުނީ ކަމަށެވެ.
ކޮންމެ އިންސާނަކީ ވެސް ދިރިއުޅުމުގައި ތަފާތު މަރުހަލާތަށް ކަނޑައްތު ކުރަމުން ދާނެ އިންސާނެކެވެ. އެއީ ގުދުރަތީ ގާނޫނެވެ. އެ ގާނޫނަކީ އެއްވެސް އިންސާނަކަށް ބަދަލު ކުރެވޭނެ ގާނޫނެއް ނޫނެވެ. ދުނިޔެ މިހެން ދެމި އޮތްހާ ހިނދަކު ދުނިޔެ ދައުރުވަމުން ދާނީ އޭގެ އެއްމެ ގަދީމީ ގާނޫނާ އެއްގޮތަށްކަން މާދިން ގަބޫލް ކުރެ އެވެ. ހަމަ ޙަޤީޤަތުގައި ވެސް އެއީ އާދަޔާޚިލާފް އިންސާނެކެވެ.
އޭނާގެ ވާހަކަތަކުން އެއީ އިހުސާންތެރިކަމާއި، ހަމްދަރުދީ އާއި އޯގާވެރިކަމާއި، ކެތްތެރިކަމާއި، ލޯބިން ފުރިފައިވާ ހިތްތިރި، ކިޔަމަންތެރި އިންސާނެއް ކަން މާދީން ޤަބޫލް ކުރި އެވެ. އަދި އެ މީހަކު މާދިންގެ އަތުގައި ހިފިއެވެ. ދުވަހަކު ވެސް ވަކި ނުވާނެ ކަމަށް ބުނަމުންނެވެ.
އެ ބީހުމާއި ފިރުމުންތަކުގެ ސަބަބުން ރޫޅި ވެރެން ގާތްވެފައިވާ މަލެއްގެ ފިޔަތައް ފަދައިން މާދިންގެ އެންމެ ޒުވާން ދުވަހެކޭ އެއް ގޮތަށް ކަރުގަނޑުގައި ވަކި ހިއްޕާލި ކަމުގެ ފޮނި ފޮނި އިޙުސާސްތައް މާދިން އަށް ކުރެވެން ފެށި އެވެ.
(ނުނިމޭ)