މިދިޔަ ޖުލައި މަހުގެ ތެރޭގައި ދައުލަތަށް ލިބުނު އާމްދަނީ 78 ޕަސެންޓު ދަށަށް ގޮސްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން ހާމަކޮށްފައިވާ ތަފާސް ހިސާބުތައް ދައްކާ ގޮތުގައި ޖުލައިމަހު ދައުލަތަށް އާމްދަނީއާއި ހިލޭ އެހީގެ ގޮތުގައި 682.2 މިލިއަން ރުފިޔާ ލިބިފައިވެއެވެ. އެހެންނަމަވެސް މިދިޔަ އަހަރުގެ މި މުއްދަތުގައި ދައުލަތަށް އާމްދަނީ އަދި ހިލޭ އެހީގެ ގޮތުގައި 3.1 ބިލިއަން ރުފިޔާ ވަނީ ލިބިގެން ގޮސްފައެވެ.
ފިނޭންސްގެ ތަފާސް ހިސާބުތައް ދައްކާ ގޮތުގައި ޓެކުހުގެ ގޮތުގައި ދައުލަތަށް ލިބިފައިވަނީ 589.2 މިލިއަން ރުފިޔާއެވެ. އެހެންނަމަވެސް މިދިޔަ އަހަރުގެ މި މުއްދަތުގައި ޓެކްސްގެ ގޮތުގައި ދައުލަތަށް ލިބިގެން ގޮސްފައި ވަނީ 2.2 ބިލިއަން ރުފިޔާއެވެ.
ޓެކްސް ނޫން ގޮތް ގޮތުން ދައުލަތަށް މިދިޔަ މަހު 87.8 މިލިއަން ރުފިޔާ ލިބިފައިވާއިރު މިދިޔަ އަހަރު ޓެކްސް ނޫން ގޮތް ގޮތުން 414 މިލިއަން ރުފިޔާ ލިބިފައިވެއެވެ.
ދައުލަތުގެ އާމްދަނީ މިހާ ބޮޑުތަނުން ދަށަށް ގޮސްފައި މިވަނީ ކޮވިޑް19 ގެ ސަބަބުން އެންމެ ބޮޑަށް ދައުލަތަށް އާމްދަނީ ވައްދަމުން ގެންދާ އެއް ވަސީލަތް ފަތުރުވެރިކަމުގެ ސިނާއަތަށް ލިބިގެން ގޮސްފައިވާ ހީނަރުކަމުގެ ސަބަބުންނެވެ.