ކަނޑުމަތީގެ ސަލާމަތާއި ރައްކާތެރިކަން އިތުރުކުރުމަށްޓަކައި، ޔޫއެންއޯޑީސީގެ ފަރާތުން އެމްއެންޑީއެފް އަށް ގިނަ އަދަދެއްގެ ތަކެތި ހަދިޔާކޮށްފިއެވެ.
މިތަކެތި ހަވާލު ކުރުމުގެ ރަސްމިއްޔާތު ބާއްވާފައި ވަނީ، ކ ވިލިމާލޭގައި ހުންނަ، އެމްއެންޑީއެފް ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރުގައެވެ.
މިތަކެއްޗާއި ހަވާލުވެވަޑައިގެންނެވީ، ޑިފެންސް މިނިސްޓަރ މާރިޔާ އަހުމަދު ދީދީއެވެ. މިތަކެތި އެމްއެންޑީއެފާއި ހަވާލުކޮށްދެއްވީ ހަވާލުކޮށްދެއްވީ ރާއްޖޭގައި ހުންނަވާ ޖަޕާނުގެ ސަފީރާ ކެއިކޯ ޔަނާއީއެވެ.
ޔޫއެންއޯޑީސީގެ ފަރާތުން އެމްއެންޑީއެފް އަށް ހަވާލުކޮށްފައިވާ ވަޞީލަތްތައް ނޭޝަނަލް މެރިޓައިމް އިންފޮމޭޝަން ފިއުޝަން ސެންޓަރުގައި ޤާއިމް ކުރުމަށް ވަނީ ހަމަޖެހިފައެވެ.
މި ވަޞީލަތްތަކުގެ ސަބަބުން ދިވެހި ރާއްޖޭގެ ކަނޑުގެ ސަރަޙައްދުގައި ދަތުރުފަތުރު ކުރަމުންދާ އުޅަނދުފަހަރު ފަސޭހައިން ބެލެވޭނެ ކަމަށާއި އަދި މިކަމުގެ ސަބަބުން ކަނޑުމަތީގައި ސަލާމަތްތެރިކަމާއި ގުޅުންހުރި ކަންކަން ރަނގަޅުވެ، ކަނޑުމަތީގައި ހިންގާ އޮޕަރޭޝަންތައް އިތުރައް ހަލުވިވެ، ހަރުދަނާވެގެން ދާނެ ކަމަށް އެމްއެންޑީއެފް އިން ބުންޏެވެ.
މީގެ އިތުރުން މި ވަޞީލަތްތަކުގެ ސަބަބުން ކަނޑުމައްޗާއި ގުޅުންހުރި އެކިއެކި މުއައްސަސާތަކާއި ދެމެދު މުވާސަލާތީ ގުޅުން އިތުރަށް ބަދަހިވެ، މަޢުލޫމާތު ހިއްސާ ކުރުން އަވަސް ވެގެންދާނެ ކަމަށް އެމްއެންޑީއެފް އިން ބުންޏެވެ.