މި މަހުން ފެށިގެން ކުރިޔަށް އޮތް ތިން މަހު ޑޮލަރު ދޫކުރާނީ ހަމައެކަނި ޒަރޫރީ ބޭނުންތަކަށް އެކަނި ކަމަށް މަރުކަޒީ ބޭންކް (އެމްއެމްއޭ) އިން ބުނެފިއެވެ.
އެމްއެމްއޭ އިން ނެރެފައިވާ ނޫސްބަޔާނެއްގައި ބުނެފައި ވަނީ މަހުން ފެށިގެން ތިން މަސް ދުވަހަށް ފޮރިން އެކްސްޗޭންޖް އިންޓަވެންޝަން އިތުރު ކުރުމަށް ރޭވިފައިވާ ކަމަށެވެ. އެހެންކަމުން އެ އަދަދު ހާއްސަ ކުރެވޭނީ ޒަރޫރީ ބޭނުންތަކަށް ކަމުގައިވާ ކާބޯތަކެތި އަދި ބޭސްފަރުވާއަށް ބޭނުންވާ ތަކެތި އިމްޕޯޓު ކުރުމަށް ކަމަށް އެމްއެމްއޭ އިން ބުންޏެވެ. ވިޔަފާރު ބޭންކުތަކަށް ދިމާވެފައިވާ ބޭރު ފައިސާ އަދި ލިކިއުޑިޓީގެ ދަތިކަމަށް ހައްލު ހޯދައި ދިނުމުގެ ގޮތުން ވިޔަފާރި ބޭންކުތަކުން އެމްއެމްއޭގައި ބަހައްޓަންޖެހޭ ދިވެހި ފައިސާ އަދި ބޭރު ފައިސާގެ މިނިމަމް ރިޒާވް ކުރިން ހުރި 10 ޕަސެންޓުން 7.5 ޕަސެންޓަށް އޭޕްރީލް މަހުގެ ތެރޭގައި ދަށް ކުރެވިފައިވާ ކަމަށެވެ. އަދި ޖުލައި މަހުގެ ތެރޭގައި 7.5 ޕަސެންޓުން 5 ޕަސެންޓަށް ދަށް ކުރެވިފައިވާ ކަމަށް ވެސް އެމްއެމްއޭ އިން ބުންޏެވެ.
ދިވެހި ރުފިޔާގެ އެކްސްޗޭންޖް ރޭޓަށް ކުރާ ނޭދެވޭ އަސަރު ކުޑަކުރުމަށްޓަކައި ވިޔަފާރި ބޭންކުތައް މެދުވެރިކޮށް ބޭރު ފައިސާގެ ބާޒާރަށް ޑޮލަރު ވިއްކުމުގައި އެމްއެމްއޭއިން ޚަރަދުކުރަން ހުންނާނީ ރާއްޖޭގެ ރަސްމީ ރިޒާވްގައި ކަމަށާއި ނަމަވެސް، ރާއްޖޭގެ ރަސްމީ ރިޒާވަށް އިތުރުވާ ބޭރު ފައިސާގެ އެންމެ ބޮޑު ބައެއް ހިއްސާކުރަނީ ފަތުރުވެރިކަމުގެ ސިނާއަތުން ޓެކުހާއި ފީގެ ގޮތުގައި ސަރުކާރަށް ލިބޭ ބޭރު ފައިސާކަމުން، ފަތުރުވެރިކަން މަޑުޖެހިފައިވާ މި ދަނޑިވަޅުގައި މީގެ ސަބަބުން ރާއްޖޭގެ ރަސްމީ ރިޒާރވްއަށް ކުރާ ނޭދެވޭ އަސަރު ކުޑަކުރުމަށްޓަކައި އެމްއެމްއޭއިން ކެނޑިނޭޅި މަސައްކަތްތަކެއް ކުރަމުން އަންނަ ކަމަށް އެ ބޭންކުން ބުންޏެވެ. އެގޮތުން، އެމްއެމްއޭ އާއި ރިޒާވް ބޭންކް އޮފް އިންޑިއާ އާ ދެމެދު ވެފައިވާ ކަރަންސީ ސްވޮޕް އެއްބަސްވުމުގެ ދަށުން 150 މިލިއަން އެމެރިކާ ޑޮލަރު ލިބިފައިވާއިރު، އެ ސްވޮޕްގެ މުއްދަތު އިތުރުކުރެވިފައިވާ ކަމަށް އެމްއެމްއޭ އިން ބުންޏެވެ.
އެމްއެމްއޭއާ ސަރުކާރާއި އަދި އައިއެމްއެފްގެ އިތުރުން ބޭރުގެ އެހެނިހެން މާލީ އިދާރާތަކުން ތަފާތު އެކި މާލީ އެހީތެރިކަން ހޯދާފައިވާކަން ފާހަގަކޮށް އެމްއެމްއޭ އިން ބުނެފައި ވަނީ އިންޑިއާ ސަރުކާރުން ރާއްޖެއަށް 250 މިލިއަން އެމެރިކާ ޑޮލަރުގެ ފައިނޭންސިން ދިނުމަށް ހަމަޖެހިފައިވާ ކަމަށެވެ. އެފަދަ އެހީތަކާއި އަދި ސަރުކާރާއި އެމްއެމްއޭއާ ގުޅިގެން ބޭރު ފައިސާގެ އެހީ ހޯދުމަށް ކެނޑިނޭޅި ކުރަމުންދާ މަސައްކަތުގެ ސަބަބުން ރާއްޖޭގެ ބޭރު ފައިސާގެ ބާޒާރަށް ދިމާވެފައިވާ ޑޮލަރު ލިބުމުގެ ދަތިތަކަށް ހައްލެއް ހޯދުމަށް މަގުފަހިވެގެންދާނެ ކަމަށް އެމްއެމްއޭ އިން ބުންޏެވެ.
މިހާރު ދުނިޔޭގައި ފެތުރެމުންދާ ކޮވިޑް-19 ގެ ބަލިމަޑުކަމުގެ ސަބަބުން ދުނިޔެއާއި ރާއްޖޭގެ އިގްތިސާދަށް ދަނީ ވަރަށް ބޮޑު އަސަރުތަކެއް ކުރަމުންނެވެ. ރާއްޖޭގެ އިގްތިސާދުގެ ބޮޑު ބައެއް ސީދާގޮތުން އަދި ނުސީދާގޮތުން ފަތުރުވެރިކަމުގެ ސިނާއަތާއި ގުޅިފައިވާއިރު، ކޮވިޑް-19 ބައްޔާއި ގުޅިގެން ދުނިޔޭގެ ހުރިހާ ގައުމުތަކެއްގެ ރައްޔިތުންވެސް މި ދަނޑިވަޅުގައި ދަތުރުފަތުރުކުރުން މަޑުޖައްސާލާފައިވުމާއި ދިވެހިރާއްޖޭގެ ބޯޑަރު ކުރިން ވަކި މުއްދަތަކަށް ބަންދުކޮށްފައި އޮތުމުގެ ސަބަބުން މި ސިނާއަތަށްވަނީ ނޭދެވޭ އެތައް އަސަރެއް ކޮށްފައިވާ ކަމަށް އެމްއެމްއޭ އިން ބުންޏެވެ.
އަދި މިހާރު ރާއްޖޭގެ ބޯޑަރު ހުޅުވާލެވިފައިވީ ނަމަވެސް، މި ބަލިމަޑުކަމުން ރައްކާތެރިވުމުގެ ގޮތުން ރާއްޖެއާއި ދުނިޔޭގެ އެހެނިހެން ގައުމުތަކުން އަޅަމުން އަންނަ އިތުރު ފިޔަވަޅުތަކުގެ ސަބަބުންނާއި މި ބަލި ކޮންޓްރޯލްކުރެވޭނެ މިންވަރާއި މުއްދަތެއް މިހާތަނަށް ޔަޤީންވެފައި ނެތުމުން، މި އަހަރުގެ ތެރޭގައި ރާއްޖެ ޒިޔާރަތްކުރާ ފަތުރުވެރިންގެ އަދަދު ވަރަށް ބޮޑުތަނުން ދަށްވެ، މި ސިނާއަތުން އަހަރުގެ ތެރޭގައި ލިބޭނެ ބޭރު ފައިސާގެ އާމްދަނީ ވަރަށް ބޮޑަށް ދަށްވެގެން ދާނެ ކަމަށް ބެލެވޭ ކަމަށް އެމްއެމްއޭގެ ބަޔާނުގައި ބުނެފައިވެއެވެ.