އިދިކޮޅު ޕްރޮގްރެސިވް ކޮންގްރެސް ކޯލިޝަންގެ އިސް ފަރާތްތަކަށް އިލެކްޝަންސް ކޮމިޝަން (އީސީ) އިން ނަސޭހަތް ދީފިއެވެ.
އިލެކްޝަންސް ކޮމިޝަނުން ކޮށްފައިވާ ޓްވީޓެއްގައި މިއަދު ބުނީ ގާނޫނާއި ހިލާފަށް ކުރިޔަށް ގެންދިޔަ ސިޔާސީ ހަރަކާތެއްގައި ބައިވެރިވެފައި ވާތީ އެކަން ތަކުރާރު ނުކުރުމަށް ޕީޕީއެމް އަދި ޕީއެންސީގެ ބައެއް އިސް ބޭފުޅުންނަށް ނަސޭހަތް ދީފައިވާ ކަމަށެވެ.
ޕީޕީއެމް އަދި ޕީއެންސީގެ އިސްވެރިންނަށް އީސީން ނަސޭހަތް ދީފައިވާއިރު ޕީޕީއެމް އާއި ޕީއެންސީ 75000 ރުފިޔާއިން އިއްޔެ ވަނީ ޖޫރިމަނާވެސް ކޮށްފައެވެ.
އިލެކްޝަންސް ކޮމިޝަނުން ބުނީ މި ދެ ޕާޓީ ޖޫރިމަނާކޮށްފައިވަނީ ސިޔާސީ ޕާޓީގެ ގާނޫނާއި، އެއްވެ އުޅުމުގެ މިނިވަންކަމުގެ ގާނޫނާއި، އާއްމު ސިއްހަތު ރައްކާތެރި ކުރުމުގެ ގާނޫނުގެ ދަށުން އެޗްޕީއޭ އިން ކަނޑައަޅާފައިވާ ގައިޑްލައިނާ ތަކުރާރުކޮށް ހިލާފުވުމާއި ގުޅިގެން ކަމަށެވެ.
ޕީޕީއެމް ޕީއެންސީ އިސްވެރިންނަށް އީސީން ނަސޭހަތް ދިންއިރު މިދިޔަ ހުކުރު ދުވަހު މި ދެ ޕާޓީން މާލޭގައި ބޭއްވި ސައިކަލު ބުރުގައި އެޗްޕީއޭގެ ގައިޑްލައިނާ ހިލާފުވި މައްސަލަ ފުލުހުން ވެސް އަންނަނީ ތަހުގީގު ކުރަމުންނެވެ.
އެގޮތުން އެ މައްސަލައާ ގުޅިގެން ކުރީގެ ރައީސް ޑރ.މުހައްމަދު ވަހީދު އާއި އެ ދެ ޕާޓީގެ ލީޑަޝިޕްގެ އިސް ބޭފުޅުން އިއްޔެ އާއި މިއަދު ވަނީ ފުލުހަށް ހާޒިރުކޮށްފައެވެ.
މާލެ ސަރަހައްދުގައި ކޮވިޑް ފެތުރެމުންދާ ދަނޑިވަޅެއްގައި ގިނަ ބަޔަކު ބައިވެރިވާ ފަދަ އެއްވުމެއް ބޭއްވުމުން ރައީސް އިބްރާހިމް މުހައްމަދު ސޯލިހު ވެސް ވަނީ އެކަން ކުށްވެރި ކުރައްވާފައެވެ.
މާލޭގެ އިތުރުން އިދިކޮޅުން މިދިޔަ ހުކުރު ދުވަހު ވަނީ ރާއްޖޭގެ އެކި ރަށްތަކުގައި ސަރުކާރާ ދެކޮޅަށް މުޒާހަރާތައް ބާއްވާފައެވެ.