"އެއާޕޯޓް ހެލްތު އެކްރިޑަރޭޝަން" ސެޓްފިކެޓު ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ލިބިއްޖެއެވެ.
ވީއައިއޭ ހިންގާ އެމްއޭސީއެލް އިން މިއަދު ނެރުނު ނޫސްބަޔާނެއްގައި އެ ސެޓިފިކެޓު ލިބިގެން ދިއުމަކީ ލިބިގެން ދިޔަ ވަރަށް ބޮޑު ކާމިޔާބީއެއް ކަމަށެވެ. މި އެކްރިޑަރޭޝަން ސެޓްފިކެޓް އެވޯޑުކޮށް އޭސީއައި ވޯލްޑުގެ ޑިރެކްޓާ ޖެނެރަލް ލުއިސް ފެލިޕް ޑީ އޮލިވޭރިއާ ވަނީ އެމްއޭސީއެލް އަށް ލިބިގެން ދިޔަ އެ ކާމިޔާބީއަށް މަރުހަބާ ދަންނަވާފައެވެ.
މި ސެޓްފިކެޓު އޭޝިއާ ޕެސިފިކް ސަރަހައްދުން ލިބިފައި ވަނީ ދެ އެއާޕޯޓަކަށެވެ. ރާއްޖޭގެ ބޯޑަރު ބަންދު ކުރުމަށްފަހު އަލުން ހުޅުވާލީ މިދިޔަ ޖުލައި މަހުގެ 15ވަނަ ދުވަހުއެވެ. ވީއައިއޭ އިން ވަނީ އެއާޕޯޓު ހުޅުވާލުމުގެ ކުރިން އޭސީއައި އިން ކަނޑައަޅާފައިވާ މިންގަނޑުތަކަށް އެއާޕޯޓުގެ ކަންކަން ފެތޭތޯ ބެލުމަށް ހާއްސަ އެސެސްމަންޓެއް ވެސް ހަދާފައެވެ.
އެމްއޭސީއެލްގެ މެނޭޖިން ޑިރެކްޓަރު ވިދާޅުވީ މި ސެޓްފިކެޓާއެކު ވީއައިއޭ އަކީ ރައްކާތެރި އެއާޕޯޓެއްކަން ކަށަވަރު ކުރެވިއްޖެ ކަމަށެވެ. މިއީ ފަސިންޖަރުންގެ ކޮންފިޑެންސް އިތުރުވާނެ ކަމެއްކަން ފާހަގަކޮށް އޭނާ ވިދާޅުވީ މި ސެޓްފިކެޓަކީ ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިޝްތިހާރު ކުރުމަށް ލިބުނު ފުރުސަތެއް ކަމަށެވެ.