ގުޅީފަޅުން ފްލެޓު ގަތުމަށް ފައިސާ ދެއްކި ފަރާތްތަކާއި ޓާޓާ ފްލެޓަށް ދައްކަން ޖެހުނު ފައިސާ ހަމަނުޖެހުނު ފަރާތްތަކުގެ ތެރެއިން ބަދަލު ހޯދުމަށް މިހާތަނަށް 170އަށް ވުރެ ގިނަ މީހުން ސޮއިކޮށްފިއެވެ.
އެގްރީމަންޓުތަކުގައި ސޮއި ކުރަމުން އަންނައިރު ބަދަލު ދެމުން ދަނީ ދެ ގޮތަކަށެވެ. އެއީ ކުރީގެ ރައީސް އަބްދުﷲ ޔާމީންގެ ސަރުކާރުން ހުޅުމާލެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ މަޝްރޫއުގެ ފްލެޓުން ފްލެޓު ދިނުން ނުވަތަ ސަރުކާރުން އެންމެ އަވަހަށް އިމާރާތް ކުރާ ތިން ކޮޓަރީގެ ފްލެޓެއް ދިނުމެވެ.
މީގެއިތުރުންވެސް ގެއްލުމުގެ ބަދަލުގެ ގޮތުގައި ފައިސާ ވެސް ދިނުމަށް ނިންމާފައިވެއެވެ. އެގޮތުން ގެއްލުމުގެ ބަދަލުގެ ގޮތުގައި 432،000 ރުފިޔާ ދޭނެ ކަމަށްވެއެވެ.
މި ސަރުކާރުން ހުޅުމާލޭގައި އަލަށް ގާއިމް ކުރާ ފްލެޓުތަކުން އެންމެ ފުރަތަމަ ފްލެޓު ދޭނީ ގުޅީފަޅުން ފްލެޓު ގަނެ، ބޯހިޔާވެހިކަން ނުލިބުނު ފަރާތްތަކަށް ކަމަށް ރައީސް ސާލިހު ވަނީ މީގެކުރިން ވިދާޅުވެފައެވެ.