ކްރިމިނަލް ކޯޓުގެ ފަނޑިޔާރުކަމުގެ މަގާމަށް ކުރިމަތިލުމަށް ހުޅުވާލި މުއްދަތުގައި އެ މަގާމަށް ކުރިމަތިލާފައިވާ ފަރާތްތަކާއި އިންޓަވިއު ކުރުމަށްފަހު "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ" ރިޕޯޓުގައި "ހައިލީ ރިކޮމެންޑް" ކުރާކަމަށް ފާހަގަކޮށްފައިވާ ކ.މާލެ މ.ގުލްޝަން، އަލްއުސްތާޒާ ދީބަނާޒް ފަހުމީ އަދި ސ.ހުޅުދޫ ހެޕީ ޑްރީމް، އަލްއުސްތާޒު މުހައްމަދު މިސްބާހު އައްޔަންކުރައްވައިފިއެވެ.
މި ދެބޭފުޅުން މިއަދު ވަނީ ޖުޑީޝަލް ސާވިސް ކޮމިޝަން (ޖޭއެސްސީ)ގައި ބޭއްވި ރަސްމިއްޔާތެއްގައި ފަނޑިޔާރުކަމުގެ ހުވާ ވެސް ކުރައްވާފައެވެ. ހުވާ ލައިދެއްވީ، ސުޕްރީމްކޯޓުގެ ފަނޑިޔާރު އަލްއުސްތާޒު ހުސްނުއްސުއޫދުއެވެ.
އަލްއުސްތާޒާ ދީބަނާޒް ފަހުމީއަކީ ގާނޫނީ ރޮނގުން ބެޗްލަރ އޮފް ލޯ (އޮނާސް) މެލޭޝިއާ އިންޓަނޭޝަނަލް އިސްލާމިކް ޔުނިވާސިޓީ އިން ހާސިލް ކުރެއްވުމަށްފަހު، މާސްޓާ އޮފް ލޯ ނިއުޒިލެންޑްގެ ޔުނިވާސިޓީ އޮފް އެންޓާބަރީ އިން ހާސިލްކުރައްވާފައިވާ ބޭފުޅެކެވެ. މީގެ އިތުރުން އެބޭފުޅާއަކީ ޖިނާއީ އަދުލުގެ ނިޒާމުގައި ގިނަގުނަ މަސައްކަތްތަކެއް ކުރައްވާ 17 އަހަރު ދުވަހުގެ ތަޖުރިބާ ހުރި ބޭފުޅެކެވެ. އަލްއުސްތާޒާ ދީބަނާޒް ފަހުމީއަކީ ކްރިމިނަލް ކޯޓަށް އައްޔަނު ކުރި ފުރަތަމަ އަންހެން ފަނޑިޔާރެވެ.
އަލްއުސްތާޒު މުހައްމަދު މިސްބާހު އަކީ ގާނޫނީ ޝަރީއާގެ ރޮނގުން މިސްރުގެ އަލް އަޒްހަރު ޔުނިވާސިޓީ އިން ބެޗްލާ އޮފް ޝަރީއާ އެންޑް ލޯ ފުރިހަމަ ކުރެއްވުމަށް ފަހު، ގާނޫނީ ދާއިރާގެ 6 އަހަރު ދުވަހުގެ ތަޖުރިބާ ހުރި ބޭފުޅެކެވެ. ގާނޫނީ ވަކީލުކަމުގައި ގިނަ އަހަރުތަކެއްގެ ޕަބްލިކް ޕްރޮސެކިއުޓަރެއްގެ ގޮތުގަ އާއި ޕްރައިވެޓް ޕްރެކްޓިސްގެ އިތުރުން، މިދާއިރާއިން ކިޔަވާދިނުމުގެ ތަޖުރިބާވެސް ހުރި ބޭފުޅެކެވެ.
މިއަދު އައްޔަނުކުރެވުނުދެ ފަނޑިޔާރުންނާއެކު މިހާރު ކްރިމިނަލް ކޯޓުގައި 11 ފަނޑިޔާރުން މަސައްކަތްކުރައްވާނެއެވެ.