ކޮވިޑް-19 ޖެހޭ ބަލި މީހުންނަށް ފަރުވާ ދިނުމަށް 75 ވެންޓިލޭޓަރު ގެނައުމަށް ހަވާލުކުރި ދުބާއީގެ "އެގްޒެކިއުޓާރޒް ޖެނެރަލް ޓްރޭޑިންގް" ކުންފުންޏާ ހަވާލުކޮށްގެން ގެނައުމަށް ހަވާލުކުރި ވެންޓިލޭޓަރުތަކުގެ ތެރެއިން 10 ވެންޓިލޭޓަރެއް އެ ކުންފުނިން ރާއްޖެއަށް ފޮނުވައިފިއެވެ.
ހެލްތު މިނިސްޓްރީން ވަނީ ދުބާއީ ކުންފުނިން ފޮނުވި 10 ވެންޓިލޭޓަރު މިހާރު ވެލާނާ އިންޓަނޭޝަނަލް އެއާޕޯޓުގައި އެބަހުރި ކަމަށެވެ. އަދި އެ ވެންޓިލޭޓަރުތަކަކީ ވެސް ހެލްތު މިނިސްޓްރީން ގެންނަން އެދުނު ވެންޓިލޭޓަރުތައްތޯ ބަލާނެ ކަމަށް އެ މިނިސްޓްރީން ބުންޏެވެ.
މި ވެންޓިލޭޓަރުތަކަކީ މީގެކުރިން އެކުންފުނިން ރާއްޖެއަށް ފޮނުވި ވެންޓިލޭޓަރުތަކުގެ ތެރެއިން ބަޔޯމެޑިކަލް ޓީމުން ބެލުމަށްފަހު އެ ވެންޓިލޭޓަރުތަކަކީ ބަލި މީހުންނަށް ފަރުވާ ދިނުމަށް އެންމެ އެކަށީގެންވާ ވެންޓިލޭޓަރުތަކެއް ނޫން ކަމަށް ބުނުމުން ބަދަލުގައި ފޮނުވި ވެންޓިލޭޓަރުތަކެކެވެ.
ވެންޓިލޭޓަރުތަކުގެ މައްސަލާގައި ރައްޔިތުން މަޖިލީހުގެ މާލިއްޔަތު ކޮމެޓީގައި ވާހަކަދައްކަވަމުން ހެލްތު މިނިސްޓަރު އަބްދުﷲ އަމީނު ވިދާޅުވީ ކޮވިޑް-19 އާއި ގުޅިގެން ރާއްޖެ ގެންނަން ދުބާއީ ކުންފުންޏަކާ ހަވާލުކުރި 75 ވެންޓިލޭޓަރުގެ ތެރެއިން ނުލިބި ހުރި ވެންޓިލޭޓަރުތައް ނުލިބޭނެ ކަމަކަށް އަދިވެސް ދެކެވަޑައިނުގަންނަވާ ކަމަށެވެ.
އަމީން ވިދާޅުވީ ކޮވިޑް-19 އާއި ގުޅޭ ހެލްތު މިނިސްޓްރީގެ ހަރަދުތަކުގެ ކޮމްޕްލައެންސް އޮޑިޓް ރިޕޯޓު ނެރުމާ ހިސާބަށް ވެސް އެ ވެންޓިލޭޓަރުތައް ނާންނާނެ ކަމަކަށް މިނިސްޓްރީން ނިންމާފައި ނުވާނެ ކަމަށެވެ.
އެކި މަރުހަލާތަކުގައި މި ތަކެތި ގެނައުމަށް މުއާމަލާތް ކުރެވިފައި ހުންނާނެ ކަމަށާއި އެގޮތުން އެ މުއާމަލާތްތަކަށް ބަލާއިރު އަދިވެސް ވެންޓިލޭޓަރުތައް ނުލިބޭނެ ހާލަތެއްގައި އޮތް ކަމަކަށް ގަބޫލުނުކުރައްވާ ކަމަށްވެސް އަމީން ވިދާޅުވިއެވެ.
"އެ ކުންފުންޏާއި މުއާލަމާތް ގެއްލިގެނެއް ނުއެއްދޭ. އެ ކުންފުނިން ވެންޓިލޭޓަރުތައް ނުފޮނުވާނެ ކަމަކަށް ނުވެސް ބުނޭ. އެ ކުންފުންޏަށް ޕޭ ކުރުމުގައި ހުރި ކަންކަމުގައި އެއްބަސްވުމަކަށް އަންނަން ޖެހިގެން އެ އެއްބަސްވުމުގައި ދިގުލައިގެން ދިޔަ ކަމަށް މައުލޫމާތު ލިބިފައިވަނީ. އެހެންވީމަ މި ގެއްލިއްޖެ ކަމަށް ކަނޑައަޅާ ހާލަތަކަށް ނުއެއް އާދޭ" އަމީން ވިދާޅުވިއެވެ.
ވެންޓިލޭޓަރުތައް ލިބުމުގައި ލަސްތަކެއް ވެފައިވާކަން ގަބޫލުކުރައްވާ ކަމަށާއި ނަމަވެސް އެ ތަކެތި ހޯދުމަށް މިހާރުވެސް މަސައްކަތް ކުރަމުންދާ ކަމަށް އަމީން ވިދާޅުވިއެވެ.
ވެންޓިލޭޓަރުތަކުގެ މައްސަލަ ފުލުހުންނާއި އޭސީސީން މިހާރު ތަހުގީގު ކުރަން ފަށާފައިވާއިރު، މި ތަހުގީގު ނިމެންދެން މިނިސްޓަރު އަމީން މިހާރު ވަނީ މަސައްކަތުން އަމިއްލަފުޅަށް އެކަހެރިވެވަޑައިގެންފައެވެ. އަދި ރައީސް އޮފީހުން ވަނީ ހެލްތު މިނިސްޓްރީގެ ބިޑު ކޮމިޓީގެ މެމްބަރުން ސަސްޕެންޑުކޮށްފައެވެ.