މީހުން ދިރިއުޅޭ އެއްވެސް ތަނެއްގައި ތެޔޮ ރައްކާ ކުރާ ނަމަ ފިޔަވަޅު އަޅާނެ ކަމަށް މާލެ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ނެރެފައިވާ އިއުލާނެއްގައި ބުނީ މާލޭ ސިޓީގައި ހިނގާ އަލިފާނުގެ ހާދިސާތައް މަދުކޮށް އެފަދަ ހާދިސާތަކުން މީހުން ސަލާމަތް ކުރުމުގެ
ގޮތުން، މިނިސްޓްރީ އޮފް ޑިފެންސްއިން 12 އޮގަސްޓް 2012 ވަނަ އަހަރު ގެޖެޓްކޮށްފައިވާ ތެލުގެ ބާވަތްތައް ގެންގުޅެ، ބޭނުންކޮށް އަދި ގުދަންކުރުމާބެހޭ ޤަވާޢިދުގެ ދަށުން ތެލުގެ ޚިދުމަތްދޭ އެއްވެސް ތަނަކުން މީހުން ދިރިއުޅޭ ސަރަހައްދަށް ތެޔޮ ސަޕްލައި ކޮށްދިނުމަކީ މަނާ ކަމެއް ކަމަށެވެ.
އަދި އެންގުމާ ޚިލާފްވާ ފަރާތްތަކަށް ޤަވާއިދުން ފިޔަވަޅު އަޅާނެ ކަމަށްވެސް މާލެ ސިޓީ ކައުންސިލުން ނެރެފައިވާ އިއުލާނުގައި އެ ކައުންސިލުން ބުނެފައިވެއެވެ.
މާލޭގައި މިދިޔަ އަހަރާއި އަދި މިދިޔަ މަހުގެ ފަހުކޮށް ވަނީ އަލިފާނުގެ ބޮޑު ހާދިސާއެއް ހިނގާފައެވެ. މިދިޔަ އަހަރު ހ. ތިލަފުށި ގޭގައި ހިނގި އަލިފާނުގެ ހާދިސާއަކީ މިފަހުގެ ތާރީހެއްގައި ރާއްޖޭގައި ހިނގާދިޔަ އެންމެ ނުރައްކާތެރި އަދި އެންމެ ބޮޑު އަލިފާނުގެ ހާދިސާއެވެ. އެ ހާދިސާގައި މީހަކުވެސް ނިޔާވެފައިވާއިރު އެތައް އާއިލާއެއްގެ ބޯހިޔާވަހިކަން ވަނީ ގެއްލިފައެވެ.
މިދިޔަ މަހުވެސް ބޮޑު އަލިފާނުގެ ހާދިސާއެއް ހިނގާފައިވާއިރު އެ އަލިފާނުގެ ހާދިސާ ހިނގި ސަބަބު ހޯދުމަށް ފުލުހުން އަންނަނީ ތަހުގީގު ކުރަމުންނެވެ. އެ ހާދިސާގައި ހެންވޭރުގައި ހުރި ކެފޭއެއް ވަނީ އެއްކޮށް އަނދާ ހުލިވެފައެވެ.