ރާއްޖެ އިން ސިންގަޕޫރަށް ކަނޑައަޅާފައި ހުންނަވާ ސަފީރަކަށް ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގައި ހުންނެވި އިބްރާހިމް ޝަހީބް އައްޔަން ރައްޔިތުންގެ މަޖިލިހުން މިއަދު ފާސްކޮށްފިއެވެ.
މަޖިލިހުގައި ބޭއްވި ޖަލްސާގައި ސިންގަޕޫރުގެ ސަފީރަކަށް ޝަހީބް އައްޔަން ކުރަން ފެންނަ ކަމަށް ފާސްވީ 58 މެމްބަރުންގެ އިއްތިފާގުންނެވެ.
ފޮރިން މިނިސްޓްރީއާ ޝަހީބް އެންމެ ފުރަތަމަ ގުޅިވަޑައިގެންނެވީ 1991 ވަނަ އަހަރެވެ. ޝަހީބް ވަނީ އޮސްޓްރޭލިއާ އިން ތައުލީމް ހާސިލް ކުރައްވައި ޑިގްރީ ވެސް ފުރިހަމަ ކުރައްވައިފައެވެ.
އިބްރާހިމް ޝަހީބު ވަނީ ފޮރިން މިނިސްޓްރީގެ އެޑިޝަނަލް ސެކެޓްރީ ކަމާއި ޑިރެކްޓަރުކަންވެސް މީގެ ކުރިން ކުރައްވާފައެވެ. އަދި އޭނާ ވަނީ ހޯމް މިނިސްޓްރީގެ ޕާމަނެންޓް ސެކްޓްރީކަންވެސް ކުރައްވާފައެވެ.
ޝަހީބަކީ ރާއްޖޭގެ ހާރިޖީ ދާއިރާގައި މަސައްކަތް ކުރައްވާ އެންމެ ތަޖުރިބާކާރު އަދި އެ ދާއިރާގައި އެންމެ ދުވަސްވީ ބޭފުޅުންގެ ތެރޭގައި ހިމެނޭ ބޭފުޅެކެވެ. އޭނާ ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމަށް އައްޔަން ކުރީ 2018 ވަނަ އަހަރުގެ ޑިސެމްބަރު މަހުގެ ތެރޭގައެވެ.