ގއ. ކޮލަމާފުއްޓާއި، ގދ. ހޯޑެއްދޫގެ ބަނދަރުގެ މަސައްކަތް މިއަދު ބަޔަކާއި ހަވާލުކޮށްފިއެވެ.
މި މަސައްކަތް ކުރުމަށް ޕްލޭނިން އެންޑް އިންފްރާސްޓްރަކްޗާ މިނިސްޓްރީގެ ފަރާތުން ހަވާލުކޮށްފައި ވަނީ ހެވީ ފޯސް ޕްރައިވެޓް ލިިމިޓެޑް އާއެވެ.
އެ ކުންފުނީގެ ފަރާތުން އެ މަސައްކަތް ކުރުމަށް ސޮއިކޮށްފައި ވަނީ ކުންފުނީގެ މެނޭޖިން ޑިރެކްޓަރު އިބްރާހިމް ޒަމީރުއެވެ. ޕްލޭނިން މިނިސްޓްރީގެ ފަރާތުން ސޮއިކޮށްފައިވަނީ ޑިރެކްޓަރ ޖެނެރަލް ފާތިމަތު ޝަނާ ފާރޫގުއެވެ.
ހަތްސަތޭކަ ތިރީސް ދުވަހުގެ ތެރޭގައި މަސައްކަތް ނިންމާލުމަށް ހަވާލުކުރި އެ މަޝްރޫއުގެ ޖުމްލަ އަގަކީ 119.6 މިލިއަން ރުފިޔާއެވެ. މި މަޝްރޫއު އަށް ދައުލަތުގެ ބަޖެޓުން ހަރަދު ކުރަނީ 28 ޕަސެންޓެވެ. ބާކީ 77 ޕަސެންޓު ހޭދަ ކުރަނީ އޯޕެކް ފަންޑް ފޯ އިންޓަނޭޝަނަލް ޑިވިލޮޕްމެންޓް (އޮފިޑް) އިންނެވެ.
ކޮލަމާފުށި ބަނދަރުގެ މަސައްކަތުގެ ތެރެއިން ބޭރުތޮށީގައި 548 މީޓަރުގެ ބޮޑުހިލަ ޖެހުމާއި 550 މީޓަރުގެ އެއްގަު ތޮށި ލުމާއި ހަތަރު ނެރުބައްތި ހަރުކުރުން އަދި 28 ބަނދަރު ބައްތި ހަރުކުރުމާއި 2،750 ސްކެއާމީޓަރުގެ ޕޭމެންޓް އެޅުމުގެ އިތުރުން 12 މޫރިންގް ބްލޮސް ލުން ހިމެނޭ ކަމަށެވެ.
މީގެއިތުރުން ފަސްދޮޅަސް ހަހާސް ތިންސަތޭކަ ތިރީސް ކިއުބިކް މީޓަރަށް ބަނދަރު ފުންކުރުމާއި 5،750 ކިއުބިކް މީޓަރަށް ނެރު ފުންކުރުމުގެ އިތުރުން 404 މީޓަރުގެ ރިވެޓްމެންޓް ޖެހުން ހިމެނޭ ކަމަށް އެ މިނިސްޓްރީން ވަނީ ބުނެފައެވެ.
ހޯޑެއްދޫ ބަނދަރުގައި 1،485 މީޓަރުގެ ބޮޑުހިލަ ބޭރު ތޮށިލުމާއި 310 މީޓަރުގެ އެއްގަމު ތޮށި ލުމާއި ހަތަރު ނެރުބައްތި އަދި 50 ބަނދަރު ބައްތި ހަރުކުރުމުގެ އިތުރުން 1،550 މީޓަރުގެ ސްކެއާމީޓަރު ގެ ޕޭމެންޓް އެޅުމުގެ އިތުރުން އަށް މޫރިންގް ބްލޮސް ލުން ހިމެނޭ ކަމަށެވެ. މީގެއިތުރުން 71،590 ކިއުބިކް މީޓަރަށް ބަނދަރު ފުންކުރުމާއި 2،250 ކިއުބިކް މީޓަރަށް ނެރު ފުންކުރުމުގެ އިތުރުން 652 މީޓަރުގެ ރިވެޓްމެންޓް ޖެހުން ހިމެނޭ ކަމަށްވެސް މިނިސްޓްރީން ވަނީ ބުނެފައެވެ.