ދައުލަތާއި ދައުވާ ލިބޭ ފަރާތްތަކުގެ ވަކީލުންނަށް ކްރިމިނަލް ކޯޓުގެ ޝަރީއަތްތަކުގައި ފޯނާއި ލެޕްޓޮޕް ބޭނުން ކުރުމުގެ ފުރުސަތު ދިނުމަށް އެ ކޯޓުން ނިންމައިފިއެވެ.
ކްރިމިބަލް ކޯޓުން މިއަދު ނެރެފައިވާ ނޫސްބަޔާނެއްގައި ބުނެފައި ވަނީ ކޮވިޑް19 އާ ގުޅިގެން ދިވެހިރާއްޖޭގައި ޢާންމު ސިއްޙަތުގެ ކުއްލި ނުރައްކަލުގެ ނުރައްކަލުގެ ހާލަތު އިޢްލާނުކޮށްފައިވުމާއެކު، މިބަލި ފެތުރުން މަދުކުރުމުގެ ގޮތުން އަތުންއަތަށް ބަދަލުކުރެވޭ ލިޔެކިޔުންތައް ވީހާވެސް މަދުކުރުމަށްޓަކައި، ޕްރޮސިކިއުޓަރ ޖެނެރަލްގެ ފަރާތުން އެ ކޯޓަށް އިލެކްޓްރޯނިކް ޒަރިއްޔާއިން މައްސަލަ ހުށަހެޅުމުގެ އިންތިޒާމުތައް ހަމަޖައްސައި، ކޯޓަށް ހުށަހަޅާ މައްސަލަތަކުގެ ލިޔުންތައް އީމެއިލްގެ ޒަރިއްޔާއިން ދަޢުވާލިބޭ ފަރާތްތަކަށް ފޮނުވަމުން އަންނަ ކަމަށެވެ.
އަދި ކޯޓަށް ހާޟިރުވާ ވަކީލުންނަށްވެސް މައްސަލަތަކުގެ ލިޔެކިޔުންތަކުގެ ކަރުދާސް ކޯޓަށް ގެނައުމުގެ ބަދަލުގައި، އެ ލިޔެކިޔުމުގެ ޑިޖިޓަލް ކޮޕީ ބޭނުންކުރުމުގެ ފުރުޞަތު ދިނުމަށް މިހާރު ނިންމާފައިވާ ކަމަށެވެ.
ނަތީޖާއެއްގެ ގޮތުން ކޯޓާއި ވަކީލުންގެ ވަރަށްގިނަ ވަގުތު ގެއްލިގެންދާ ކަމަށާއި އެކަމަށް ޙައްލެއް ހޯދުމުގެ ގޮތުން، މިއަދުން ފެށިގެން ދައުލަތާއި ދަޢުވާލިބޭ ފަރާތުގެ ވަކީލުންނަށް ލެޕްޓޮޕާއި ޓެބްލެޓާއި ސްމާޓް ފޯން ޝަރީޢަތުގެ މަޖިލީހަށް ވެއްދުމުގެ ފުރުޞަތު ދިނުމަށް ކްރިމިނަލް ކޯޓުގެ ޤާޟީންގެ މަޖިލީހުން ނިންމާފައިވާ ކަމަށް ކްރިމިނަލް ކޯޓުގެ ނޫސްބަޔާނުގައި ބުންޏެވެ.
އެފަދަ ވަސީލަތްތައް ޝަރީއަތުގެ މަޖިލީހަށް ވެއްދުމުގެ ފުރުސަތު ދިނަސް، އަޑުއެހުންތައް ރެކޯޑް ކުރުމާއި ވީޑިއޯ ކުރުމަކީ މަނާ ކަމެކެވެ. އަދި އެފަދަ ކަމެއް ކޮށްފި ނަމަ ފިޔަވަޅު އެޅިދާނެ ކަމަށް އެ ބަޔާނުގައިވެ އެވެ.