މާލޭގެ ކަރަންޓީނު ފެސިލިޓީއެއްގައި ހުރި ކޮވިޑް 19އަށް ޕޮޒިޓިވް އަންހެނަކަށް ބިދޭސީއަކު ޖިންސީ ގޯނާކޮށް ފުރައްސާރަ ކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.
އެ އަންހެން މީހާ އަށް ޖިންސީ ގޯނާކޮށްފައި ވަނީ އެ ފެސިލިޓީގައި މަސައްކަތް ކުރާ ބިދޭސީއެއް ކަމަށްވެއެވެ.
ފުލުހުން ބުނީ މާލޭގެ ކަރަންޓީނު ފެސިލިޓީއެއްގައި ހުރި 26 އަހަރުގެ އަންހެނަކަށް އެތަނުގައި މަސައްކަތްކުރާ ބިދޭސީ ފިރިހެނަކު ޖިންސީ ގޯނާކޮށް ޖިންސީ ފުރައްސާރަ ކުރި މައްސަލައެއް މިދިޔަ އާދީއްތަ ދުވަހު ހުށަހަޅާފައިވާ ކަމަށެވެ.
އެ މައްސަލަ ފުލުހުންގެ ފެމެލީ އެންޑް ޖެންޑާ އެފެއާޒް ޑިޕާޓްމަންޓުން ތަހުގީގުކުރަމުން އަންނަ ކަމަށް ވެސް ފުލުހުން ބުންޏެވެ.
މީގެކުރިންވެސް ކަރަންޓީން ފެސިލިޓީތަކުން މިފަދަ މައްސަލަތައް ފެންމަތިވެފައިވެއެވެ. އަދި އެ މައްސަލަތައް ވެސް ފުލުހުން ވަނީ މީގެކުރިން ތަހުގީގު ކުރާ ކަމަށް ބުނެފައެވެ.