ސަން ޓްރެވަލްސް ކުންފުނީގެ ބޭންކް އެކައުންޓްތައް ފްރީޒްކުރަން ސިވިލް ކޯޓުން އަމުރުކޮށްފިއެވެ.
ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަދި މަޝްހޫރު ވިޔަފާރިވެރިޔާ އަހުމަދު ސިޔާމްގެ ކުންފުނީގެ އެކައުންޓްތައް ފްރީޒް ކުރުމަށާއި އަދި އެކައުންޓްތަކުގެ ތަފްސީލުތައް ސިވިލް ކޯޓަށް ފޮނުވަން އެ ކޯޓުން ބޭންކަށް އަމުރުކުރީ މިދިޔަ އާދިއްތަ ދުވަހުއެވެ.
ސަން ޓްރެވަލްސްއާ ދެކޮޅަށް އެގޮތަށް އަމުރު ނެރުމަށް އެދުނީ ހިލްޓަން އިންޓަނޭޝަނަލް ކުންފުނިންނެވެ.
އެގޮތަށް ސިވިލް ކޯޓުން އެދިފައި މިވަނީ ސަން ޓްރެވަލްސް އިން ނ. އިރުފުށި ރިސޯޓް ހިންގުމުގެ އެއްބަސްވުން ބާތިލް ކުރުމުން ބަދަލުގެ ގޮތުގައި 24 މިލިއަން ޑޮލަރު ދެއްކުމަށް ސިންގަޕޫރު އާބިޓްރޭޝަން އިން ހުކުމް ކޮށްފައި ވަނިކޮށެވެ.
އެހެންނަމަވެސް އެ އެއްބަސްވުމާއި އެއްގޮތަށް ސަން ޓްރެވަލްސް އިން ފައިސާ ދައްކަމުން ނުދާތީ އެ މައްސަލަ ހިލްޓަންސް އިން ވަނީ ރާއްޖޭގެ ކޯޓުތަކަށް ވެސް ހުށަހަޅާފައެވެ. ސިންގަޕޫރު އާބިޓްރޭޝަން އިން ސަން ސިޔާމްގެ ކުންފުންޏަށް 24 މިލިއަން ޑޮލަރު ދޭން ހުކުމް ކުރި ނަމަވެސް ރާއްޖޭގެ ސިވިލް ކޯޓުން ހިލްޓަންގެ މައްޗަށް ވަނީ 16 މިލިއަން ޑޮލަރު ދެއްކުމަށް ހިލްޓަންގެ މައްޗަށް އަމުރުކޮށްފައެވެ.
އެހެންނަމަވެސް ހައިކޯޓުން ވަނީ އެ ހުކުމް ފަހުން ބާތިލްކޮށްފައެވެ.