ޗެނަލް13 އިން ގެނެސްދިން ޕްރޮގްރާމެއްގައި ރައީސް އިބްރާހިމް މުހައްމަދު ސޯލިހުގެ ހަށިކޮޅުގައި ހުޅުޖެހުމަށް ގޮވާލި މައްސަލައާ އެ ޗެނަލް އިން މައާފަށް އެދި ބަޔާނެއް އާއްމު ކުރުމަށް ބްރޯޑްކާސްޓިން ކޮމިޝަން (ބްރޯޑްކޮމް) އިން އަންގައިފިއެވެ.
އެ މައްސަލައިގެ ތަހުގީގު ނިންމާ ބްރޯޑްކޮމް އިން ބުނީ އެ މައްސަލައާ ގުޅިގެން ވަކިފަރާތަކަށް ބުރަނުވެ މުސްތަޤިއްލު ތަޙްޤީޤެއް މި ކޮމިޝަނުން ކުރުމުގައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ކަމާބެހޭ ޤާނޫނުތަކުގައި ބަޔާންކޮށްފައިވާ އެންމެހާ ޙައްޤުތައް މައްސަލަ ރައްދުވި ފަރާތަށް ލިބިދެވުނުކަން ކަށަވަރުކުރުމުގެ ގޮތުން، މައްސަލަ ރައްދުވާ މީޑިއާ ރިންގް ޕްރައިވެޓް ލިމިޓެޑްގެ ޗެނަލް 13 އަށް ޖަވާބުދާރިވުމަށް ފުރުސަތު ދީފައިވާ ކަމަށެވެ.
މައްސަލައަށް ޖަވާބުދާރީވެ، މީޑިއާ ރިންގް ޕްރައިވެޓް ލިމިޓެޑުން ފޮނުވި ސިޓީގައި "ރައްޔިތުންގެ އަޑު ޕްރޮގްރާމް" ގައި އާންމު ފަރާތަކުން ދެއްކި ކަމަށް ތުހުމަތުކުރެވިފައިވާ ކޮންޓެންޓާ ގުޅިގެން މޯލްޑިވްސް ޕޮލިސް ސަރވިސަސް އިން އެ ކޮންޓެންޓްވެސް ހިމެނޭގޮތަށް ޖިނާޢީ ތަޙުޤީޤެއް ފަށްޓައި އެ މައްސަލަ އަވަސް މައްސަލައެއްގެ ގޮތުގައި ތަޙުޤީޤުކުރަމުންދާކަމާއި، އެ ޗެނަލްގެ ތިން ފަރާތެއް ޕޮލިހަށް ހާޒިރުކޮށް ބަޔާން ނަގާފައިވާކަމާއި، ޖިނާއީ ތަޙުޤީޤެއް ހިނގަހިނގާ އޮތް ކަމެއްގައި ތަޙުޤީޤުގެ މެދުން ވަކި ފިޔަވަޅެއް އެޅުމަކީ ނުވަތަ މައްސަލަ ވަކި ގޮތަކަށް ނިންމެވުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 43 ވަނަ މާއްދާގައި ބަޔާންކުރާފަދަ އަދުލުވެރި އިދާރީ ފިޔަވަޅަކަށް ނުވުމުގެ ފުރުސަތު ބޮޑުކަމާއި، މިގޮތުން އެއްކުށަކަށް ދެ އަދަބެއް ނުވަތަ ދެފަހަރު ފިޔަވަޅު އެޅުމަކީ ކޮމިޝަނުން ނިންމާ ނިންމުގެ ނަތީޖާކަމަށް ވެގެން ހިނގައިދާނެކަމަށް ފާހަގަކޮށްފައިވާ ކަމަށް ބްރޯޑްކޮމް އިން ބުންޏެވެ.
، 6 އޮކްޓޫބަރު 2020 ގެ ނިޔަލަށް ސިއްޙީ ކުއްލި ނުރައްކަލުގެ ހާލަތު އިޢުލާންކޮށްފައިވަނިކޮށް، ކޮމިޝަންގެ ކުއްލިނުރައްކަލުގެ ހާލަތުގައި ޝަކުވާބަލައިގަތުމާއި، ފިޔަވަޅު އެޅުމުގައި ޢަމަލުކުރަމުންދާ އުޞޫލު އެއްފަރާތްކުރުމަށްފަހު، ޢާންމު ގަވާއިދު (ކޯޑް އޮފް ޕްރެކްޓިސް) ގެ ދަށުން މައްސަލަ ބަލައި ފިޔަވަޅު އެޅުމަކީ ޤާނޫނު ތަންދޭ ކަމެއް ނޫންކަމާއި، ޙާއްޞަ އުޞޫލެއްގެ މައްޗަށް ޢާންމު އުޞޫލު ތަތްބީޤު ކުރުމަކީ ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ވެސް އަދި ޤާނޫނީ ނިޒާމުވެސް ދަންނަކަމެއް ނޫންކަން ފާހަގަކޮށްފައިވީނަމަވެސް؛
ޗެނަލް13 އިން ބްރޯޑްކާސްޓުކުރި ކޮންޓެންޓަކީ ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ އެއް ވަނަ ހަމައިގެ ދެވަނަ ނަންބަރާއި، ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ އެއް ވަނަ ހަމައިގެ ތިންވަނަ ނަންބަރާ ޚިލާފް ކޮންޓެންޓެއް ކަމަށް ކޮމިޝަނުގެ ތަޙުޤީޤަށް ސާބިތުވާކަމުގައި ކަނޑައަޅައި މިއީ، ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ އެއްވަނަ ހަމައިގެ ދެވަނަ ނަންބަރާއި، ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ އެއްވަނަ ހަމައިގެ ތިން ވަނަ ނަންބަރާ ޗެނަލް13 އިން ޚިލާފުވާ ފުރަތަމަ ފަހަރު ކަމަށެވެ.
ބްރޯޑްކޮމް އިން ބުނީ ބްރޯޑްކޮމްގެ ގާނޫނުގެ 44 ވަނަ މާއްދާގެ (ހ) ގެ ތިންވަނަ ނަންބަރުގެ ދަށުން މަޢާފަށް އެދި ބަޔާނެއް ނެރުމަށާއި، އެއްވެސް ޝަރުތެއް ނެތި އެ ބަޔާން 14 ސެޕްޓެންބަރު 2020 ވާ ހޯމަ ދުވަހުގެ ކުރިން، ދެ ދުވަހު، “ރައްޔިތުންގެ އަޑު” ޕްރޮގްރާމް ފެށުމުގެ ކުރިންނާއި 14 ސެޕްޓެންބަރު 2020 ވާ ހޯމަ ދުވަހުގެ ކުރިން، ދެ ދުވަހު، 20:00 އިން 21:00 އާ ދެމެދުގެ ވަގުތެއްގައި ޗެނަލް13 އިން ޢާންމުކުރުމަށް އަންގާ ކަމަށެވެ.