ކޮމިޝަނަރު އޮފް ކޮލިޓީ އެޝުއަރެންސްގެ މަގާމަށް ބޭފުޅަކު ހޯދަން އިއުލާންކޮށްފިއެވެ.
މި މަގާމަށް އިއުލާން ކުރީ ސިވިލް ސާވިސް ކޮމިޝަނުންނެވެ. މި މަގާމަކީ ސިއްހީ ހިދުމަތްތެރިންގެ ގާނޫނުގައި ކަނޑައަޅާފައިވާ މަގާމެކެވެ.
މި މަގާމަށް ބޭފުޅުން ހޯދަން ސީއެސްސީ އިން ކޮށްފައިވާ އިއުލާނުގައި ބުނެފައި ވަނީ ކޮމިޝަނަރު އޮފް ކޮލިޓީ އެޝުއަރަންސްގެ މުސާރައެއްގެ ގޮތުގައި ކަނޑައަޅާފައިވަނީ މަހަކު 13890 ރުފިޔާ ކަމަށެވެ.
ސާވިސް އެލަވަންސްގެ ގޮތުގައި މަހަކު 2000 ރުފިޔާ ކަނޑައަޅާފައިވާއިރު، ޓެކްނިކަލް ކޯ އެލަވަންސްގެ ގޮތުގައި މަހަކު 3889.20 ރުފިޔާ އަދި ސްޕެޝަލް ޑިއުޓީ އެލަވަންސްގެ ގޮތުގައި މަހަކު 4861.50 ރުފިޔާ ލިބޭނެއެވެ.
މީގެ އިތުރުން ސިވިލް ސާވިސްގެ މުވައްޒަފުންނަށް ހަމަޖެހިފައިވާ އުސޫލުން ބޭސްފަރުވާގެ ހިދުމަތް ލިބޭނެ ކަމަށާއި، ދިވެހިރާއްޖޭގެ ޕެންޝަނާ ބެހޭ ގާނޫނުގެ ދަށުން ލިބިދެވޭ ޕެންޝަން ކޮންޓްރިބިއުޝަން ލިބޭނެކަމަށް ވެސް ސިވިލް ސާވިސް ކޮމިޝަނުން ކޮށްފައިވާ އިއުލާނުގައި ބުނެފައިވެއެވެ.
ކޮމިޝަނަރު އޮފް ކޮލިޓީ އެޝުއަރެންސްގެ ބައެއް ޒިންމާތަކުގެ ތެރޭގައި ސިއްހީ ހިދުމަތުގެ ފެންވަރު ކަށަވަރު ކުރުމަށާއި، މުވައްޒަފުންނާއި ހިދުމަތް ލިބިގަންނަ ފަރާތްތައް ރައްކާތެރިކުރުމަށް އެކުލަވާލަންޖެހޭ އުސޫލުތަކާއި މިންގަނޑުތައް އެކުލަވާލުން ހިމެނެއެވެ.