ކުރީގެ ނާއިބު ރައީސް އަހުމަދު އަދީބުގެ މައްސަލައް ކްރިމިނަލް ކޯޓުން ބޭރު ކޮށްލުމުން ދައުލަތުން ހައިކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުމެއް މާދަމާ މެންދުރަށް އެ ކޯޓުން ތާވަލުކޮށްފިއެވެ.
ހައިކޯޓުގައި އަދީބުގެ ޝަރީއަތުގެ އަޑުއެހުން ތާވަލް ކޮށްފައިވަނީ މާދަމާ މެންދުރުފަހު 14:00 އަށެވެ. އަޑުއެހުން އޮތީ ވީޑިއޯ ކޮންފަރެންސްކޮށެވެ.
މި މައްސަލާގައި އެންމެ ފަހުން ބޭއްވި އަޑުއެހުމެއްގައި މައްސަލަ ބައްލަވާ ފަނޑިޔާރު ވަނީ މި މައްސަލަ ކުރިއަށް ގެންދިޔުމަށް އަދީބަށް ވަކީލަކު ހަމަޖައްސަން އެންމެ ގިނަވެގެން ވެސް ދެވޭނީ 10 ދުވަސް ކަމަށް ވިދާޅުވެފައެވެ.
އަދީބުގެ މައްޗަށް ދައުލަތުން އުފުލި ހަތް ދައުވާ ވެސް ކްރިމިނަލް ކޯޓުން ބޭރުކޮށްލުމުން އޭނާ ހުރީ މިނިވަން ވެފައެވެ. ދައުވާތައް ބާތިލް ކުރުމުގައި ބޮޑަށް ބިނާކޮށްފައި އޮތީ އަދީބު އާއިއެކު ތަހުޤީގު މަރުހަލާގައި ޕްރޮސެކިއުޓަރ ޖެނަރަލް އާއި އަދީބުއާއެކު ވެފައިވާ އެއްބަސްވުންތަކުގެ މައްޗަށެވެ.
މި ދައުވާތައް ކޯޓުން ބޭރުކޮށްލުމުން ޕްރޮސެކިއުޓަރ ޖެނެރަލް ވަނީ މައްސަލަ ބެއްލެވި ގާޒީ އިސްމާއިލް ރަޝީދަށް ފާޑު ވިދާޅުވެ އޭނާގެ މައްސަލަ ޖޭއެސްސީ އަށް ހުށަހަޅާފައެވެ. އަދި ޖޭއެސްސީން މިހާރު ވަނީ ގާޒީ އިސްމާއިލް ސަސްޕެންޑު ކުރުމަށް ވަނީ ނިންމާފައެވެ.
އެމްއެމްޕީއާރްސީގެ ހިޔާނާތާ ގުޅިގެން، އަދީބުގެ މައްޗަށް އުފުލާފައި ވަނީ، ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާއެކެވެ.