ސ. ފޭދޫ ސްކޫލްގެ ކުރީގެ ޕްރިންސިޕަލް އަބްދުއްލަތީފް އަލީ އާއި ކުރީގެ ލީޑިން ޓީޗަރު އަބްދުﷲ ޒުހޭރުގެ އަމިއްލަ ވިޔަފާރި އަށް "އީ-ބޭ" އިން އޮންލައިންކޮށް އޯޑަރުކޮށްގެން ގެންނަ ތަކެތި އެކި ތަންތަނަށް ޑެލިވަ ކުރުމުގެ މަސައްކަތުގައި ސްކޫލްގެ މުވައްޒަފުން ރަސްމީ ގަޑީގައި ބޭނުންކޮށްފައިވާ ކަމަށާއި، އަދި އެފަދަ ތަކެތި ސްކޫލްގެ މުވައްޒަފުންނަށް ވިއްކާފައިވާ ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުނު މައްސަލަ ތަހުގީގު ކުރުމަށް ފަހު ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
މި މައްސަލަ ކޮމިޝަނުން ތަޙްޤީޤް ކުރި ކުރުމުގައި ފާހަގަ ކުރެވުނު ކަންތައްތަކަށް ބަލާ އިރު، ޢަބްދުއްލަތީފު އާއި ޒުހައިރުގެ ނަމުގައި ޕޯސްޓް އޮފީހަށް ލިބިފައި ހުންނަ ބައެއް ތަކެތި އެ ސްކޫލްގެ ބައެއް މުވައްޒަފުން ސްކޫލަށް ގެނެސް ހަދާކަމާއި، ބައެއް ފަހަރު ޕޯސްޓް އޮފީހުން ޕްރިންސިޕަލްގެ ގެއަށް ވެސް ތަކެތި ގެންގޮސް ދޭކަމާއި، ގިނައިން އެފަދަ ތަކެތި ގެންދަނީ ސްކޫލަށް ކަމާއި، އެގޮތުން ގެންދާ ތަކެތި ޢަބްދުއްލަތީފާއި ޒުހައިރު ސްކޫލުގައި އެތަކެތި ބަހައްޓައިގެން ސްކޫލުގެ މުވައްޒަފުންނަށާއި، ޓީޗަރުންނަށް ވެސް ވިއްކައި ހަދާ ކަމަށް އެނގިފައިވާ ކަމަށް އޭސީސީން ބުންޏެވެ.
އަދި ޒުހެއިރު އީބޭން ގެނައި ފޯނެއް ސްކޫލުގެ ރަސްމީ ގަޑީގައި އެ ސްކޫލްގެ މުވައްޒަފަކަށް ވިއްކާފައިވާ ކަމާއި، އާންމު ގޮތެއްގައި މަހަކު 2 ނުވަތަ 3 ފަހަރު ޢަބްދުއްލަޠީފް ޢަލީ އާއި ޒުހައިރު އޮންލައިންކޮށް ގެންނަ ތަކެތި އެ ސްކޫލްގެ ބައެއް މުވައްޒަފުން ލައްވައި އެ ސްކޫލަށް ގެންނަ ކަމަށް ތަޙްޤީޤަށް ފާހަގަ ކުރެވިފައިވާތީ އާއި، ދިވެހި ސިވިލް ސަރވިސް ގަވާއިދުގެ 17 ވަނަ މާއްދާގެ (ހ) އާއި (ށ) ގެ ދަށުން، ސިވިލް ސަވިސް މުވައްޒަފުން އޮފީހުގެ ރަސްމީ ގަޑީގައި އަމިއްލަ ވިޔަފާރި އާ ބެހޭ ނުވަތަ މާލީ މަންފާއެއް ލިބޭފަދަ ނުވަތަ މާލީ މަންފާއެއް ނުލިބޭ އަމިއްލަ މަސައްކަތް ކުރުމާއި، އެފަދަ މަސައްކަތެއް އޮފީހުގެ އެހެން މުވައްޒަފުން ލައްވައި ކުރުވުމަކީ މަނާކަމެއްކަމަށް ބަޔާންކޮށްފައިވާތީ، ކޮރަޕްޝަން ހުއްޓުވުމާއި މަނާ ކުރުމުގެ ޤާނޫނު ގެ 14 ވަނަ މާއްދާގެ (ހ) ގެ ދަށުން ފޭދޫ ފުލްމޫން، ޢަބްދުއްލަޠީފް އާއި ފޭދޫ ނީލޯފަރުގޭ ޒުހައިރުގެ މައްޗަށް ދަޢުވާ ކުރަން ޕީޖީ އަށް ފޮނުވީ ކަމަށް އޭސީސީން ބުންޏެވެ.
މި ދެ މީހުން މައްޗަށް މަގާމުގެ ނުފޫޒު ނާޖާއިޒު ގޮތުގައި ބޭނުން ކުރި ކަމުގެ ދައުވާއެއް ވެސް ކުރަން މިދިޔަ ޖޫން މަހުގެ 20 ދުވަހު އޭސީސީން ވަނީ ޕީޖީ އަށް ފޮނުވާފަ އެވެ.