މޯލްޑިވްސް ބްރޯކާސްޓިން ކޮމިޝަން (ބްރޯޑްކޮމް) އަށް ސެކްރެޓަރީ ޖެނެރަލް (އެސްޖީ) އެއް ހޯދުމަށް އިއުލާން ކޮށްފިއެވެ.
ބްރޯޑްކޮމް އިން ކޮށްފައިވާ އިއުލާނެއްގައި މިއަދު ބުނީ އެ ކޮމިޝަނަށް އެސްޖީއަކު ބޭނުންވާ ކަމަށެވެ. އެ މަގާމަށް ހޮވޭ ބޭފުޅަކަށް މުސާރައިގެ ގޮތުގައި 20،500 ރުފިޔާ ލިބޭނެއެވެ. ލިވިން އެލެވަންސް އެއްގެ ގޮތުގައި 15،000 ރުފިޔާ ލިބޭއިރު ފޯނު އެލަވަންސްގެ ގޮތުގައި 700 ރުފިޔާ ލިބެއެވެ. އަދި މަގާމުގެ މަސައްކަތާއި ގުޅިގެން ކަނޑައެޅިފައިވާ އެހެނިހެން އެލަވަންސްތައް ދެވޭނެ ކަމަށް އިއުލާނުގައިވެއެވެ.
މި މަގާމަށް ކުރިމަތިލާ ފަރާތްތަކަކީ މާސްޓާސް ޑިގްރީ ޙާޞިލް ކޮށްފައިވާ ފަރާތަކަށް ވާންޖެހެއެވެ. ހިންގުމުގެ ދާއިރާގައި މަދުވެގެން ފަސް އަހަރު ދުވަހުގެ ތަޖުރިބާ ލިބިފައިވާ މީހަކަށް ވާންޖެހެއެވެ. މީގެއިތުރުން ހިންގުމުގެ ދާއިރާގައި ސީނިއަރ މެނެޖްމެންޓް އާއި އެގްޒެކެޓިވް ލެވެލްގައި މުވައްޒަފުން ގޮވައިގެން މަސައްކަތް ކުރުމުގެ ތަޖުރިބާ ލިބިފައިވާ މީހަކަށްވެސް ވާންޖެހެއެވެ.
މަގާމުގެ މަސްއޫލިއްޔަތުގެ ތެރޭގައި ދިވެހިޖުމްހޫރިއްޔާގެ ޤާނޫނުއަސާސީއާއި ޤާނޫނުތަކާއި، މޯލްޑިވްސް ބްރޯޑްކާސްޓިންގ ކޮމިޝަންގެ ޤާނޫނާއި ކޮމިޝަނުން ހަދާ ޤަވާޢިދުތަކާއި އެއްގޮތްވާ ގޮތުގެ މަތިން ކޮމިޝަންގެ އިދާރާ ހިންގާ ބެލެހެއްޓުމާއި ކޮމިޝަނުން ހަދާ ޤަވާޢިދުތަކާ އެއްގޮތްވާ ގޮތުގެމަތިން ކޮމިޝަންގެ ޖަލްސާތަކުގެ އިދާރީ ކަންތައްތައް ހިންގާ ބެލެހެއްޓުން ހިމެނެއެވެ. އަދި އެ ކޮމިޝަނަށް އެކަށައެޅިފައިވާ ބަޖެޓާއި އެއްގޮތްވާ ގޮތުގެ މަތިން، ކޮމިޝަނުގެ މަޤްޞަދު ޙާޞިލުކުރުމަށް ކުރަންޖެހޭ ކަންތައްތައް ކުރުމަށް އެކަށޭނަ މުވައްޒަފުން ހިމެނޭ އިދާރާއެއް ޤާއިމު ކުރުމުގައި ކޮމިޝަނަށް އެހީތެރިވުން ވެސް ހިމެނެއެވެ.
މި މަގާމަށް ކުރިމަތިލާ ފަރާތްތައް އަންނަ މަހުގެ ފަސްވަނަ ދުވަހުގެ 13:00ގެ ކުރިން އެ ކޮމިޝަނަށް ހުށަހަޅަންޖެހެއެވެ.