ގްރޭޓާ މާލޭ އިންޑަސްޓްރިއަލް ޒޯން ލިމިޓެޑް އާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އެއްކޮށްލިކަން ގްރޭޓާ މާލެ ކުންފުނިން ރަސްމީކޮށް އިއުލާންކޮށްފިއެވެ.
ގްރޭޓާ މާލެ ކުންފުނިން ނެރެފައިވާ ބަޔާނެއްގައި ވަނީ އެކުންފުންޏާއި އެޗްޑީސީ އެއްކޮށްލުމަށް ސަރުކާރުން ނިންމާފައިވާ ކަމަށެވެ. އެގޮތަށް އެ ދެ ކުންފުނި އެއްކޮށްލުމަށް ސަރުކާރުން ނިންމަވާފައި ވަނީ ދެ ކުންފުނި އެއްކޮށްލުމުން މާލީ ގޮތުންނާއި އަދި ހިންގުމުގައި ލިބޭނެ ފައިދާ ތަކަށް ރިއާޔަތް ކުރުމަށްފަހު ހުޅުމާލެ، ތިލަފުށި، ގުޅިފަޅު ހިމެނޭ ގޮތަށް ގްރޭޓާ މާލޭ އޭރިޔާ ތަރައްގީ ކުރަން ކުރަންޖެހޭ އެންމެހައި މަސައްކަތްތައް އެއް ކުންފުންޏެއްގެ ދަށުން ކުރިއަށް ގެންދިއުމުގެ މަގުސަދުގައި ކަމަށެވެ.
އެ ބަޔާނުގައި ބުނީ ސަރުކާރުން އެކުލަވާލައްވާފައިވާ ސިޔާސަތުތަކާ އެއްގޮތަށް ހުޅުމާލެ، ގުޅިފަޅު އަދި ތިލަފުށި ތަރައްގީ ކުރުމުގެ މަސައްކަތްތައް އެޗްޑީސީ އިން ކުރިއަށް ގެންދާނީ ސަރުކާރުގެ މަޝްވަރާއާއި ލަފާގެ މަތިން ކަމަށެވެ.
އެގޮތުން، ފުރަތަމަ މަރުހަލާއެއްގެ ގޮތުން ގްރޭޓާ މާލެ ކުންފުނީގެ އެންމެހައި އެސެޓަކާއި ލައިބިލިޓީ އާއި، މުވައްޒަފުންނާއި އަދި އެންމެހައި އެއްބަސްވުންތަކާއި ކުންފުނީގެ މައްޗަށް އޮތް އެންމެހައި އިލްތިޒާމްތަކާއި ޒިންމާތައް އެޗްޑީސީއަށް ބަދަލުކުރުމަށް ނިންމާފައިވާކަން އެންމެހައި ފަރާތްތަކުގެ މައުލޫމާތަށްޓަކައި އާންމުކޮށް އަންގާ އިއުލާނު ކުރާ ކަމަށް ބަޔާނުގައިވެއެވެ.
އެނިންމުމާއި ގުޅިގެން އެ ކުންފުންޏާއެކު ހެދިފައިވާ އެއްބަސްވުންތަކަށާއި ލިޔެކިޔުންތަކަށް ގެންނަންޖެހޭ އެންމެހައި ބަދަލުތައް ގެނައުމަށް އެ ކުންފުނިން އެފަރާތްތަކާއެކު މުއާމަލާތް ކުރަމުން ގެންދާނެ ކަމަށްވެސް ގްރޭޓާ މާލެ ކުންފުނިން ބުންޏެވެ.