ކޮވިޑް19 އާއި ގުޅިގެން އަޅަމުން ގެންދާ ފިޔަވަޅުތަކަށް ހުދު ސަރުކާރުން ވެސް އަމަލު ނުކުރާ ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިފަދައިން ވިދާޅުވީ ދާދިފަހުން ފޮރިން މިނިސްޓްރީން ބޭއްވި ރަސްމިއްޔާތެއްގައި ހޯމް ކަރަންޓީނުގައި ހުންނެވި ފޮރިން މިނިސްޓަރު އަބްދުﷲ ޝާހިދު ބައިވެރިވެވަޑައިގެން މައްސަލައާ ގުޅިގެންނެވެ.
ޖަމީލް ކުރެއްވި ޓްވީޓެއްގައި ވިދާޅުވީ ހުދު ސަރުކާރުން ކޮވިޑްގެ ފިޔަވަޅުތައް ޤަބޫލްނުކުރާކަން ޝާހިދުގެ ޢަމަލުތަކުން ސާބިތުވެއްޖެ ކަމަށެވެ. އެތައް ބައެއް ފުރާނައަށް ނުރައްކާވެއްޖެ ކަމަށް ވިދާޅުވެ ޖަމީލް ވަނީ އެކަން ރަނގަޅުނަމަ، އެތަައް ޒުވާނުންނަކަށް ކުރި ޖޫރިމަނާ ބާތިލްވާނެ ކަމަށް ވިދާޅުވެފައެވެ. އެ ފައިސާ އަނބުރާ ދޭންޖެހޭނެ ކަމަށާއި ޤާނޫނުގެ ޙުކުމް ސަމާސާއެއް ކަމަށް ދެކެނީތޯ ޖަމީލް ވަނީ ސުވާލު ކުރައްވާފައެވެ.
ހުދު ސަރުކާރުން ކޮވިޑްގެ ފިޔަވަޅުތައް ޤަބޫލްނުކުރާކަން @abdulla_shahid ގެ ޢަމަލުތަކުން ސާބިތުވެއްޖެ. އެތައް ބައެއް ފުރާނައަށް ނުރައްކާވެއްޖެ. އެކަން ރަނގަޅުނަމަ، އެތަައް ޒުވާނުންނަކަށް ކުރި ޖޫރިމަނާ ބާތިލް. އެ ފައިސާ އަނބުރާ ދޭންޖެހޭ. ޤާނޫނުގެ ޙުކުމް ސަމާސާއެއް ކަމަށް ދެކެނީތޯ؟ pic.twitter.com/XJadOU07Mk
— Mohamed Jameel Ahmed (@MJameelAhmed) September 23, 2020
ނަމަވެސް އެކަމާއި ގުޅިގެން ފޮރިން މިނިސްޓްރީން ބުނެފައިވަނީ އިންޑިއާ އިން ރާއްޖެއަށް ދިން 250 މިލިއަން ޑޮލަރުގެ ބަޖެޓު ސަޕޯޓު ދިނުމަށް ބޭއްވި ރަސްމިއްޔާތުގައި ފޮރިން މިނިސްޓަރު އަބްދުﷲ ޝާހިދު ބައިވެރިވެވަޑައިގެންފައި ވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ހުއްދަ ލިބިގެން ކަމަށެވެ.
ފޮރިން މިނިސްޓްރީ އިން ބުނީ މިނިސްޓަރު ޝާހިދު އެ ހަފްލާގައި ބައިވެރިވީ އެޗްޕީއޭގެ ހާއްސަ ހުއްދައެއްގެ ދަށުން ކަމަށެވެ. އަދި އެމަނިކުފާނު ހުންނެވީ ވެސް ހޯމް ކަރަންޓީނުގައި ކަމަށެވެ. ކުރިޔަށް އޮތް ދުވަސްތަކުގައި ވެސް މިފަދަ އެހެން ހަފްލާތައް ހުރުމުން އެޗްޕީއޭގެ ހުއްދަ ނަގައިގެން އެ ހަފްލާތަކުގައި ވެސް ބައިވެރިވާނެ ކަމަށް އެ މިނިސްޓްރީން ބުނެއެވެ.